ديوان الشاعر \ نافع الحربي

تسلم القلب لابيض مشكور على ماقلت لاهنت





عاشوا ذوي صالح اهل الطيب والوفا

لهم بفعل الواجبات دليل

سرات قومٍ سمح الله طريقهم

عن المروة مالهم بديل

يشهدلهم في موقف الطيب فعلهم

فعلاً على وضح النقا جليل

يما وقفوا بالمال من دون ربعهم

لاصد عنها بالزمان بخيل

يقفون وقو ف الشامخة من جبالها

اللي بقراها للهوى صليل

ربعي اهل الوقفات ياحي فالهمّ

بالشمس والا في ضلال ظليل

على مغيب الجدي سريت فاطري

عن دربي المقصود ماتميل

تمسي وتصبح فوق ديمومة الفلا

لها بروس النابيات هذيل

شاعر وقول الشعر في روس قومي

اللي لحمول الواجبات تشيل

ومالي ومال اللي ردية عزايمه

شيخ السعة بالصاملات هزيل

مدحي لربعي من مواجيب شيمتي

ومهما نقول بحقهم قليل

بديت بمطروقٍ بدعته من الحشى

يبري فوادٍ بالضمير عليل

هذا وسلامي على من عليه سلم

راع الوفا حلو النبأ خليل

ومن صد عني ماترجيت نايله

غني بعون الله عن كل هبيل


هواي دارٍ نوخ المزن فوقها

خضراء منابتها على سليل

في ديرةٍ من ماطر الوسم سايلة

صيد الخلاء باطرافها جفيل

مادمت حيٍ وأقدر السير باتي

غيابي عن الربع الحشام محيل

تمت وختمت الوفا في قصيدتي

ألفين وخمس وعشرين مديل

نافع مطر هذه القصيدة في مناسبة مخيم ال صالح من المراوين في ام رقيبة هذا العام