ربعي لهم ذكرن مع الناس وهاج

عش رجب ترا عجب...كان الناس يعرفون بعضهم فى الماضى سوى قريبين من بعض او بعيدين فالامير معروف والفارس معروف والكريم معروف والعقيد معروف وصاحب الرأي والمشوره معروف...أما فى عصرنا هذا أختلطت الامور وكثر الادعياء وبدأ الكثيرين يدعون ماليس لهم ويضعون أنفسهم وأهلهم بمواقع ليست لهم مع اطيب التحايا للجميع.....

أليكم هذه الابيات التى كان لها سبب ومناسبه وأن كنت لاأحبذ هذا النوع من الشعر ولكن قد يفرض الموقف نفسه ويكون للمقام مقال...........[/center][/font][/size][/color]

هات القلم أكتب لنا باسود الزاج= ليت القلم ماخط حروفن عليله
الهم في قلبي مثل عصف الامواج= هم(ن) توطن به وهم(ن) يـجـيله
تنزف مشاعرنا مثل عين الافلاج= ساعة رقيت أنا رأس الـطـويـلـه
أفكار تـقـفي بي وتـقـبل بي أفـواج= أسباب ناس(ن) ماتحوش النفيله
فـكـري مـقـديني على كل مـنهـاج= ماأحب أعيل وكاره(ن) كل عـيـله
وليا تـعـرض لي مـن الناس هـلباج= نـقـال حكي(ن) ضـيـع الله دليله
أكـويـه بالـمكوى على مـقرن حجاج= وجهه عريض وكل خزي(ن) يشيله
أركي على كبده مثل واهـج الصـاج= الوجه كاسيه الخـزى تـقـل نـيـله
ترى مريض النفس عندي له عـلاج= عندي علاجه والدواء والـوسـيله
بعـض العــرب كـنـه على رأسه الـتاج= فـعـله خـيالي والسـوالف مهـيـله
التــايـه الـلي بالظهيرة له ســراج= الـلي على الغرات يومي شـلـيـله
خـيـال حــكــي بـالـمـجـالـيـس هــراج= ماهو من اللي يكرهون الفـشـيـله
يدخل مـداخـيـل(ن) عـلى غـير مخـراج= لاخير فى رجل(ن) ضيع سبيله
كـانه غــرير(ن) لغاية العـلــم مـحـتـاج= الـهـرج يـكـفي عـن كثيره قــلـيـلـه
حـنا لـيــا صاب العـرب خــوف رجــراج= نرسي كما ترسي جبال(ن) ظـلـيـله
أجـدودنا تـأخـذ عـلى الخـيــل مـسـهـاج= يــومـنـها بالسـيف ورمـح وفـتـيله
بالطيب تلقانا كما عين هداج=ونرسي ليا بار العميل بعميله
نــعــدل الــلـي ماشــي الـــدرب مـنعــاج= نـشـفـي عن الكـبد العـليـله غـليله
ربــعــي لهــم ذكــر(ن) مــع الـناس وهاج= زحـول الرجـال محتـمـيـن الدبـيـله
لــربــعــهـــم أرق مــن ســلــك ديـــبـــاج= طــيـب وكـرم كـل الـعـلـوم الجـمـيله
الله مـــن قــلــب(ن) لـهـــم دوم مــبـهــاج= والله مــن قــلـب(ن) تـزايـد غـلـيله
ســيـف المعزة للعدو يلعــج العاج= صـيـده جـزيل ولايصـيـد الهـزيـلـه
والا أنـت تـبـع(ن) بـيـن الاجـواد مـنلاج= عــسـى الـولي للي مـثـلـك يــزيـلـه
لا أنـت بـاب الـدار ولاأنــت بـمـزلاج= حتى نـشـوف العـيــب ونـلـقــى بـديـلـه
أنت عتبة دار قـول(ن) بلا أحـراج= قـالـوا عـتـبـة الدار صـعــب(ن) مـشـيـله
وتـمـت بـذكر الـلي ولي(ن) للأفـراج= اللي مـاغـيـره البـشــر تـلـتـجــي لــه
وصـلاة ربـي عـد ماأطـاف حــجـاج= عــلـى نـبـي الحــق راع الـفــضـــيــلـه

صح لسانك على قصيدتك
لاكن القصيده الي فالمقدمه محيوسه الله يطول عمرك فوق تحت
وانت شاعر تعرف صدر البيت وعجزه كيف تغلط الغلطه هذي

الأخ الشاعر ..نادر النادر
صح لسانك وبيّض الله وجهك على هاالقصيده الجزله
ابدعت وربي يالنادر في صياغتها
.........
اما بالنسبه لقصيدة هايس العنزي ...مثل ماقل الاخ معجب الحربي محيوسه حيل
ولاكن ماعلينا منها ..المهم قصيدتك انت وتسلم يمينك

لعنايتك ...جل احترامي وتقديري

الاخوين الكريمين / معجب الحربى و تركي العماني

صحت ابدانكما وبيض الله وجيهكما
سريتمونا بمروركم وكريم شعوركم
واشكر لكما ملاحظتكم على القصيدة التى اوردتها قبل مشاركتي والحوسة التى لم انتبه له لأنني كنت كاتبها على الورد والظاهر لما عملت لها كوبي وبيست ثم نسقتها إحتاست الامور ولم أنتبه لذالك على العموم حصل خير ولقد تم حذفها نهائيا
مع صادق الموده والاحترام للجميع

الاخ القدير نادرالنادر

صح السانك ودام بنانك وبيض الله وجهك

تقبل تحيتي وتقديري

صح لسانـكـ وعـلا شانـكـ ...

وليف الشوق وعاشق الصمان
صحت ابدانكم وبيض الله وجيهكم
وكل الشكر والتقدير على المرور النبيل وكريم الشعور
دمتم بخير

صح لسانك وسلم بنانك



قصيدة رائعه بروعة حضورك



لك تقديري

نادر وانت نادر



صح لسانك وعلا شانك



كتبت وابدعت



تحياتي لك

لله درك

نص جززززززل بكل حالاته

صح السانك