قصيدتي في حفل نواف بن غالب

هذي مشاركة متواضعه لي في حفل تأسيس مركز غسل وقد اقام رئيس المركز الخال نواف بن غالب الحنيني حفلاً في هذه المناسبه واليكم مشاركتي ودمتم في اتم الصحه والعافيه

اول بدى باسم الله البادي وبالله استعين=على اختيار المفردات ووزن قاف امثالها
والثانيه والشعر ديوان العرب والاولين=وقصايد الشعار يعرف دقها وجلالها
والشعر تجسيد المشاعر للسعيد وللحزين=وقريحة الشاعر لياهاضت شعوره قالها
والشاعر المحسوب لاجا الموقف البيّن يبين=وليا وزن قاف القصيده مانقص مكيالها
يفتح مع البحر الطويل بمركب المعنى الثمين=وحمض العلوم اللي تسد قصارها بطوالها
والليله اسعد وابرك الساعات في هالساعتين=اللي جمعت اطلق وجيهٍ ماكرهت قبالها
قدر المعزّب والضيوف وكبر جاه الزايرين=عساي اوفّي حقها التقدير باستقبالها
يامرحبا والله يحييكم على سمن وسمين=والعود الازرق مع فناجيلٍ تفوح دلالها
في حفل راس العز والنوماس نسل الطايلين=عينه على روس المعالي والعلا يرقالها
نواف بن غالب طموح وعزم قاسي مايلين=وسما الطموح لطالب الطولات هل هلالها
امير في كل الامور بكل حال وكل حين=وان حضر صعبات الامور يحلها حلالها
وليا استلم مركز قياده كفو وقيادي وامين=واكيد مايزهى بشوت العز غير رجالها
لعل عزك يالحنيني دايم ٍ طول السنين=واعلى المناصب والمراتب جعل فالك فالها
وختامها صلوا على جميع المرسلين=اللي نعيم اسلامنا لرسالته وافضالها

وســـــــــــلامتكم
الشاعر / نواف فرج المرواني