زومالة السلمان ذي عضيب للشيخ ضيف الله بن صقر المعبدي

الاوله سلام من قاضي سليم لحرب وتخص الهباني
الشيخ ضيف الله جويد الساس مايشناه شاني
هذاك ابن وارد ورد لطيب من قاصي وداني
تعارفوا جدي وجدك يوم كلاً وله صنيعه

والثانيه جيتك وانا ابن عضيب للواجب ولاشي حداني
بيت القضاء المبني وجوه قضاه زادوا بالمباني
عراف نفسر فالوجيه وفالسلوم وفالمعاني
ورثة جدود وكسب يمنى حطها المولى طبيعه

والثالثه وش شي ماهو شي لكنه يشاهد للعياني
موجود في ارض الله وما تقدر تحددله مكاني
يظهر ولكن ماتشوفه فالظلام ولايباني
اول سعى ثاني جرى ثالث قرأ ثاني ربيعه

الرد

يامرحبا ترحيب وافي من عزيزين المباني
باسماء معبد كلهم عداد من صام رمضاني
الناس مايغوى عليها الجدي وسهيل اليماني
الله ليهدينا ويهديكم على نهج الشريعه

جيتوا على سبل الوفا ياصحابنا من غير شاني
القصر مبني فوق ساسه من على هاك الزماني
عرفت جدك وانت علمي مايغرك من لساني
الله يعز الدين ويعز الرجال اهل المقامات الرفيعه

والثالثه ياللي بنيت اللغز حله ماعظاني
هذا السراب ولاغويته يالرياجيل الذهاني
يرهيبه الضميان لكنه يغره في ثواني
قد غر هاجر مير ربك عاضها شربه نضيفه




وسلامتكم
وانتظروني فلي عوده لنقل باقي الحدايا