الطيب مرقاه عسر ولا يجيبه غير قرناس

الليلة أمسيت افكر فالبشر والــــــياهم اجـــــــناس = احد عليه الرضا واحد عليه المكرهيــــــــــة
الناس فيهم ذهب صافي وفيهم تــــــوت وانحاس = والبعض منهم مضيع لاهناك ولاهنيــــــــه
راحو فريقين كل في ضميره قــــــيس اقـــيـــاس = احد نهى النفس واحد طاوع النفس الشقيـــــة
احد ورى الخير يسعى للبشر في كـــــل مجلاس = واحد ورى الشريسعى ماحسب ذنب وخطية
المسعد اللي نهج منهاج صالح فــــعل واحساس = مراقب الله واعماله عليها القابليـــــــــــــــــة
موحد الله ومبعد عن الاضــــرار بالـــــــــــناس = مسعاه دايم لوجه الله واسبــــــــــــــــاله نقية
وليا بنــــا بنيته جود لها العمدان والســــــــا س = ممشاه دايم على وضح النـــــــقا في كل نيه
واليا نخيته رفع راسه وقال ابشر ولابـــــــــاس = ابشر بعزك ولالي عن طلبكم مــــــــعذرية
طلبك مسعاي والا انت تبي شيـــمـة من الراس = اللي تبيها على المجدال ماتصـــــــعب عليه
يقضي لزومك وهي لاهل الوفا شيمة ونوماس = هـذي صفات الرجا ل الطيبين الصــــــارفيه
واحد يهذب لك الاقوال مار العرق دســــــاس = لوقالوا الزين في قلوب البشر نية خفـــــــــية
يسعى على التفرقة بين العرب نمام بــــــلاس = مافيه تقوى ولارحمــــــــــــة ولاله مرعوية
والبعض الاخر حياته كلها تفليس وافـــــلاس = ماشي في درب الهوى والغي واعلومه ردية
البحر واسع وفيه من البشر عايم وغطــــاس = احد لقي جوهرة واحد لقي حوتة طــــــــرية
الطيب مرقاه عسر ولايجيبه غير قــــــرناس = اللي ليا مد جنحانه يــــــــــــــعشي له رعية
وحنا ترى مسلمين وناخذ الاسلام مقــــيـــاس = واللي تمسك بدينه عروته دايم قـــــــــــــوية
تمت وصلو على محمد عدد ماهب نسناــــس=* واعداد مالاح براق الحيا فالــــــــــــــعقربية