البارحه

البارحه يوم كل(ن) يضحك حجاجه = أنا الهواجيس تقفيبي وتزعجني
ذكرت غرو(ن) لهالحين أونس خلاجه = لاجيت أبا أنساه جا طيفه يهرجني
كنت أنتظر منه ضحكة قلب ومواجه = وليا ضحك لي تقول انه محججني
أفرش له القلب والاشواق ديباجه = ياصعب وصف الشعور اللي يخالجني
يجي يحرك سكون الشوق وأمواجه = تقول كنه على كيفه مبرمجني
ياكثر ماأمر بيته تقل ابي حاجه = وليا صدفته طعن قلبي وعالجني
علق عليه الحيا نيشانه وتاجه = لو أدرجه مايقول فلان يدرجني
أولم الهرج وأفكر بمخراجه = وليا نظرته نسيت اللي يخارجني
ذكر عليه ( سفير الحرف ) وأحراجه = أحراجه اللي حصل له مثله أحرجني
وهالحين ماغير ذكرى الحزن وافواجه = وليا نسيته يجي طيفه ويزعجني

شعر / المحايد
سفير الحرف = لافي بن حمود الغيداني