هاجس الأشعار

ياهاجس الأشعار وش لون ما أغليك=بيني وبينـك مـا تشيـن العلاقـه
عرفتني قبـل الشقـا والشرابيـك=مثل الثنين اللـي ربـوع ورفاقـه
يامـا فزعنـا بيـن ذولا وذوليـك=يوم أن ولـد الاش يحتـك ساقـه
نحكـم بها ما هو بحكـم المماليـك=اللي يصـك البـاب ويفـك طاقـه
وياما سرينا مع صعـاب المساليـك=ويامـا خذينـا حملهـا والوساقـه
لا صكت الدنيـا علـي الشبابيـك=أخـذت فالسبـع البحـور أنطلاقـه
آخذ من الحاضر حضـاره تزاهيـك=وعندي من الماضي تـراث وعراقـه
أمدح بك اللـي مايخيـب هقاويـك=كسّابت النامـوس لا جـات فاقـه
بالطيبـه ترقـا ويسمـو معاليـك=مثل الحصان اللي كسب في سباقـه
واطوع العاصي وأضـد الصعاليـك=أسوقهـم فالـدرب قدمـي سياقـه
وأعاتب الصاحب على قول يرضيك=وأشره عليه أن جات فيه أنطراقـه
وأقدم أعذاري ليا قـال وش فيـك=أن شاف مـا زّود عليـه أحتراقـه
وأناجي المحبوب باسمـه وأناديـك=تشهد على هـذا الغـلا وأشتياقـه
لا غاب عن عيني بجيبك وأوديـك=مرسـول مابيـن الثنيـن بلباقـه
لو تنشري بالمال ندفـع ونشريـك=وش لون دام أنك مع الروح باقـه
أفرح ليا جاني مع النـاس طاريـك=وأحزن ليا قالـوا ضعيـف اللياقـه!!