الهاجوس

ألا واهني اللي سليم من الهاجوس=ليافات ثلث الليل مادّك هاجوسه
ولا أركى على كوعه وكل العباد غطوس=يسرح مع الأحداث بالوقت ويقوسه
يعاني من الأيام وقتٍ هبوبه كوس=وكل يعاني من زمانه وكابوسه
تدور الليالي والليالي بهن ادروس=ومن عاش بالدنيا تجاريبه ادروسه
بحكم التجارب خط سيره يقوسـه قوس=على ماتقول الناس .. خطوات مدروسه
ألا يازمان السلم ياوقتي المنحوس=لقيت الغرايب والفتن فيك مدسوسه
لقيت البناخي للبناخي يجي دبوس=ويدخل كما بالضرس ماتدخل السوسه
خليٍ من الغيره خليٍ من الناموس=يطش الشرف قدام رجليه ويدوسه
ولقيت الرجل يغتاب غايب بحـد الموس=يسولـف ولوكان الرجاجيل مضروسه
ليا لاح عـرض فلان لو له عيال جلوس=يدرعـم قليل العـرف مايشغـل احسوسه
على مابدا لي منه شيخ طلع بفلوس=مزمـر وخشمه لاقيٍ ناسٍ تبوسه
وأناخابر إنّه وارثً راعي الفانوس=لقاها وراه بشدة البخـل محروسه
وأنا أقول مالٍ شيَّـخ الهبـع والدنفوس=ابا أموت ماحطيت حاجات ملموسه
لياصار يطلع روس لو هي مكانة روس=يداحم زعيم مربطه كان سايوسه
لو المال زندٍ حي له واقع ملموس=ولاهي غريبه قِيـم الرجل بفلوسه
ينّزل بوادي ويل ويحط بالفردوس=ومذموم حرمانه وممدوح ناموسه
بمالـك تفك مغربلٍ منعسر محبوس=تفكه رساله منك بالصّك مدبوسه
لوالمال له شنصٍ موفق مع الهلبوس=لحيث انها ماهي بالاحسان مريوسه
لو المال من عيبه وجوده يشيل انفوس=وراع المال طول الوقت مشغول حاسوسه
بوقت الفراغ تقول طالب بكالريوس=ولا ينتهي غير المحطات محيوسه
واباأطلب من الشعار تفصيلـة القاموس=تفصل نقاطٍ بآخر الوقت محسوسه

غازي الزغيبي

صح لسانك وعلا شانك

والله يعطيك العافيه على القصيده الجزله

بيض الله وجهك

تحياتي

ومن قال سالم و غانم

صح الله لسانك

قصيدة رائعه بحق

تحياتي

صح لسانـكـ وعـلا شانـكـ ...
رائعـة من روائعـكـ ... كما عودتنــا ....
لا عدمنـــاكـ يالغالي
تحياتي

صح لسانك


قصيده رائعه وتستحق الاعجاب من شاعر متمكن

صح لسانك وسلم بنانك يالعملاق

	الله يـعـطـيـك الـعـافيـــــــــــة على القصيده وصح لسانك مليون بيض الله وجهك

الشاعر غازي الزغيبي
صح لسانك دايم جزل
في كل الأحوال جزل
دائماً أقف عند كل بيت من قصائدك
أستفيد من ترابط القصيدة وتدويرها
وقوة اللفظ والتورية في المعنى ( وهذا منتهى البلاغة )
وألمس فيها السجع والرجز والقصيدة
دمت بكل الودة ووافر المحبة ،، أخوك
لكن ههه أخوك الصغير ؟؟؟؟؟

صح لسانك يابو طلال على القصيدة الجزله


دايم الحكمة والواقعية لها عندك الشي الكثير


صورت لنا واقع نراه ويتكرار امامنا كثيراً باسلوب شعري فريد من نوعه

ينّزل بوادي ويـل ويحـط بالفـردوس
ومذمـوم حرمانـه وممـدوح ناموسـه



الله لايهينك يالعملاق

صح لسانك يابو طلال على القصيدة الجزله