من راس مال ماهو ريال وفرنك ، قصيدة

السلام عليكم ورحمة الله وبركاتة

هذه القصيدة طرحتها هنا سابقاً ونظراً لتعديل بعض أبياتها والزيادة فيها أحببت طرحها بصورتها النهائية

من رأس مـال ماهو ريـال وفرنـك
بصـرف لكم وأحـرر بموجبه شيـك

رصيد خبـره ماعـرف خزنة البنـك
خذها دروسٍ من تجارب محاكيك

ثــلاث فيـها العــز ما عنـها وعنـك
اظفـر بهـا وأطلـب لها الله يهديـك

الـديــن والتقـوى وخلـق يحسنــك
أثبـــت عليهـا ولا تغيــــر مباديــك

وثـلاث خذها وخلهـا دوم ديـدنك
نية وقول الحق وأصلح خوافيـك

وثلاث تجلي ضيقة الصدر والضنك
عفـوك ومعروفك وفزعـة لناصيـك

وثـلاث من وصلك للأرحـام يلفنك
عمـر طويل ورزق وأجر لمساعيـك

وثـلاث رفعـة لو حظوظك تمكنـك
مـال وحياء بعده تواضـع معاليـك

وثـلاث تجني خيـرها بعـد مَدْفنك
صدقتك مـع علمك وبـر الولد فيك

وثــلاث عـن عــزم عزمتـه تهونـك
قـل وكسل مع خوف ثقل خطاويك

وثلاث قفـل دونهـا بـاب مخزنــك
أمانه وسـر الخوي وأخف أمانيـك

وثلاث تأخذها سلف والوفـاء منك
بِر وفجور وشمت في اللي يعاديك

وثـلاث مـا تبقــى عليهـن أراهنــك
صحــة وقــوة مـع شباب بماضيك

وثـلاث منـها إيــاي وإيــاك تفتنـك
صديق سو ونفس وابليس يغويك

وأحـذر ثـلاث أقلهـا النـاس تلعنـك
الـظلـم والطغيـان والــزور يعميـك

وثلاث عيب ولا تجي إهانتـه منك
ضيف وضعيف وعانيٍ من عوانيك

وثلاث مالـك حصـن منها يحصنـك
صديق الأمس وجاهل وجار يوذيك

وثــلاث تفـديها ليـا طــاب معدنـك
ويرخص لها الغالي عليهـن أوصيك

دينك وبعد الدين عرضك وموطنك
تُذكـــر بهــا بالخيـــر لاحل طـاريك

وتفريجك لمكروب في حزة الضنك
الله بها في موقف الحشر يجزيـك

والنـت شيـطان العصـر لا يشيطنك
أحـذر شياطينـه عن الحـق ترديـك

ولا تاخـذ بفتـوى المجـاهيل تفتنك
أنشـد هــل الأذكـار بالعلـم تفتيــك

ولا تستشيــر اللـي برايـه يـداهنـك
ولا جاهـل يختار لك رأي يرضيـك

ولاتستحي من واحدٍماأستحى منك
مـا دون حلقـك تدفعـه راحـة يديـك

ولا تطـرد المقفـي ترى مادرى عنـك
ولا تبيـع رجـل باع غيـرك وشاريـك

ولاتسوم وجهـك عند من لايثمنـك
مـالـك ومــال دروب يمــه توديــك

وإذا بـدالــك واحـــدٍ مـا يـواطنـك
أبعــد عنــه وأدراه دامــه يداريــك

وترى الذهب في مظهره يشبه الزنك
لايخدعــك لمـع المظـاهـر ويغريــك

واللـي طعـن غيـرك ليـا راح يطعنـك
إن جاك يطعن به وعنده طعن فيـك

وحمل الجمايـل والمعـاريف يدفنك
يصبــح بها الأحـرار مثـل المماليـك

و أحفظ في أمورك كلبوها توازنـك
لاتندفـع فيها ولا الخـوف يقصيـك

وإذا الـزمـن دارت رحاتـه وطاحنـك
وشهب السنين وباير الوقت حاديك

إزبــن علـى اللـي لا نصيتــه يـزبنـك
اللـي علـى الثنتـين دايـم مخـاويـك

لأحتـاج عاونتـه ولأحتجـت عاونـك
لا مَـــنّ لا مــعــذار لا ذي لا ذيـــك

صح السانك وعتلاشانك اخي البيرق
قصيده جزله مميزه جدونادره لمااحتوت
عليه من نصايح من خلال الثلاث المتتابعات
الطيبه

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

قصيدة او قل معلقة او قل دستور الحياة
لاتكتفي بقراءتها بل يجب ان نحفظها غيبا
لما فيها من نصأئح وحكم لاتقدر بالاثمان
مهما قلنا عنها فلن نوفيها حقها
ماشاء الله تبارك الله شاعر مبدع
صح لسانك مليارات
وصدقت عندما قلت (من راس مال ٠٠٠٠

	المشاركة الأصلية كتبت بواسطة محمدالعيسى

	صح السانك وعتلاشانك اخي البيرق قصيده جزله مميزه جدونادره لمااحتوت عليه من نصايح من خلال الثلاث المتتابعات الطيبه

صح بدنك أخوي محمد العيسى
شاكر ومقدر مرورك أسعدني ياغالي
الله يعطيك العافية
تحياتي

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح بدنك ملايين ياغالي
الله يعافيك و وجهك أبيض
تحياتي

	المشاركة الأصلية كتبت بواسطة حسيـن

	قصيدة او قل معلقة او قل دستور الحياة لاتكتفي بقراءتها بل يجب ان نحفظها غيبا لما فيها من نصأئح وحكم لاتقدر بالاثمان مهما قلنا عنها فلن نوفيها حقها ماشاء الله تبارك الله شاعر مبدع صح لسانك مليارات وصدقت عندما قلت (من راس مال ٠٠٠٠

هلا ومراحب ، هذا من ذوقك ياغالي
شهادة أعتز بها ، شكراً على الإطراء
صح بدنك والله يعطيك العافية
تحياتي

صح الله لسانك
ولاهنت
وسلم فكرك وبنانك
دمت برعاية الله وحفظة

	المشاركة الأصلية كتبت بواسطة فهد ابن غانم

	صح الله لسانك ولاهنت وسلم فكرك وبنانك دمت برعاية الله وحفظة

صح بدنك الله يسلمك
وأنت في حفظه ورعايته
تحياتي