الغاز رمضانية عام 1435ه

عـدد ليـال الصـوم للـي حاضـريـن=الـغـاز فالمصـحـف تـلاقـي حـلـهـا
ياويـش بنـتٍ جابـت السـر الدفـيـن=مــن طيبـهـا ياكـثـر نــاس تجـلـهـا
نالت شرف ماينمحي طول السنين=والـنـاس فالمـيـدان تـذبــح خـلـهـا
ياويش رجلٍ مايسـر الخايفيـن=الي تحسـب المـوت ماياصلهـا
جمـاد لاكنـه حفـظ شـيٍ ثمـيـن=بامر الولي ذيك الاماكـن دلهـا
انشدك عن عدة رجـالٍ حاقديـن=الـنـادره راحــت سبـايـب غلـهـا
قالو سندهم فالمصايب حرمتين=يمهل عضيم الشـان ولايمهلهـا
يـاويـش بـنـتٍ ماتـحـب العابـثـيـن=تحـمـا وطـنـهـا مـايـجـي محتـلـهـا
من خيرها بعض الاوادم عايشين=شفت القصور الفارهه تعمـل لهـا
حكمـه بليغـه لرجـال الملحـديـن=اضعف جنود الارض مايقدر لها
رجال يغزي والجيوش مسلحين=بالغصـب يـاخـذ لقمـتـه ويشلـهـا
وشـو خويـن لرجـال الغانميـن=والـي حصلـه بالمثـل حاصلهـا
لاحـي ولاينعـد ضمـن الميتيـن=مـدة زمـن لــو طـولـت ياقلـهـا
ياويش ورعٍ يجرحه لمس اليدين=مايحتـمـل غــظ الـيـديـن وجـلـهـا
ملبوس عذرى ماكلوهـا الاكليـن=الــي تـخـش الـفـم ولايسمحـلـهـا
ياويش رجلٍ يزعج الصوت الحزين=باسـبـاب حفـنـه صـاحـبـه مشتـلـهـا
خـلا كثـيـر الـقـوم لاجـلـه ملحـديـن=رغــــم الــدلايــل مـاتـغـيــر دلــهـــا
وشـــــــــي فــــتـــــاةٍ مـــــــــن قـــديـــمـــات الــســنــيـــن=كـــــــم واحـــــــدٍ وقـــــــت الــضــنـــك يــــزبــــن لــــهــــا
صـــــــــــارت مــــــــــــلاذٍ لــــــرجــــــال الــمــتــرفـــيـــن=بــــــعــــــد الــــــرجـــــــال الـــهـــالـــكــــه تــحــتـــلـــهـــا
رجال بلوى لرجـال الصامليـن=ناسٍ ترد النفس ماتخضع لهـا
ياكثر نـاسٍ عنـد بابـه فاشليـن=الحرب ماهم لاجرت كفـؤ لهـا
انشدك عن رجـال شـاق المعدميـن=تـبـغـى تـجــي مـثـلـه ولاحـاصـلـهـا
للخلق ينضر والنضر في نص عين=مـاطـولــت دنــيــاه راحــــت كـلـهــا
انشدك عن عـدة رجـالٍ ميتيـن=بالطايلـه راع الوفـا ينـده لـهـا
لبـو نـداه ولاتــردو مسرعـيـن=وشلون تسمع كلمته و تجلهـا
وشـي فتـاتٍ جابـت العلـم الثميـن=للـي مصـالـح ديـرتـه يعـمـل لـهـا
عذرى عليها يحرصون الحاكمين=بـس الـذي مقصـود ماحسـب لهـا
وش الذي لاحل شاق الطامعيـن=ذيـك الـسـوارح لالـفـت تحبلـهـا
صار السبب ماطولو مستانسين=الله يـكـافـي شــــر ماحـاصـلـهـا
وشي فتاتٍ ضحكت متمصخرين=تنـزل محـلٍ صـح مايصلـح لـهـا
بس النهايه ماتسـر الضاحكيـن=مر الذي من خلقتـه يسمـح لهـا
ياويش رجلٍ شايلينـه راحليـن=وشلـون ميـت فالمتـايـه دلـهـا
تتبع خطاوي جرته متحمسيـن=في ديرةٍ محي الاثر وصف لها
وش الذي لاجيب سر الناضرين=بعض البشر تموت مايحصل لها
مجيوب للـي روحـو مستعجليـن=لـديـره الــي شـرهـا نــازل لـهــا
وشي فتـاتٍ ريحـت قلـبٍ حزيـن=قلـب العزيـز الـي حيـاتـه ملـهـا
وهبه من المعبود رب العالمين=لـلـي يمـيـنـه طـولــت ماشـلـهـا
وشم رجـالٍ للحمـول موصليـن=حملـه خفيفـه مايتـعـب حملـهـا
راحو بها للي نووهـم قاصديـن=والي تجي له حالته يوسف لها
وش الذي فرج هموم الصابرين=سـاعـة وفــت بعلومـهـا حولـهـا
نـادر وحيـد ولاتلـوه السارحـيـن=يسـكـن ديــارٍ ماسكـنـت بضلـهـا
وش ميتـه مايرتجيهـا مرتجـيـن=وشلون تحيا والسبب ضيفٍ لها
جابـت عيـالٍ لـلاوادم صالحـيـن=من يوم ذاك الضيـف بيـده تلهـا
وشي فتـاتٍ ياقفـون الواصليـن=الخلق خلف البنت مايسمح لها
فالارض يوجد مثلها متشابهين=بالشكل لاكن حجم ماتشبه لهـا
وش الذي طوع عصاةٍ كافرين=ناسٍ علوم اليـن ماتصلـح لهـا
صارو بعد شافـوه لله ساجديـن=سجده غريبه للولي يصفح لها
وشي فتاتٍ دوم اهلها منصتين=فالموقع الي لالفت ينصت لهـا
بلمحة بصر لاغلقت متوحديـن=وحده كثير النـاس ماتنكـر لهـا
وشـي فتـاتٍ دونـهـا قــولٍ مبـيـن=لولا الطمع والحسد مايوصل لها
راحو ثلاثه من سببهـا خاسريـن=لـديــره الـــي غـيـرهـم ماحـلـهـا
وش الذي ربعه يجـرون الونيـن=باسـمـه ينـادونـه ولايـفـزع لـهـا
غالـي سميـه مـا تخلـيـه اليـديـن=لولاه بعض الناس ما يحسب لها
وشي فتاتٍ شابهت فعل الرجين= للي زعل والناس تشكي ذلها
سميها ينقال لشخص المتين = دور لها ياصاحبي دورلها
وشو خوين مع خويه سارحين=والعين شافت شي مايصلح لها
باسباب كلمـه ماتعـدو هامديـن=واصبح خويه كلمته يشرح لها
وش الذي مرسول للقلب الحزين=عـنـا المطـايـا صاحـبـه يوصلـهـا
صوغه زهيده ماتساوي درهمين=سوت جميلـه صعـب مايقـدر لهـا

والله الولد كتبها ولاحبيت اردها في خاطره

لاكن للاطلاع فقط والحقيقه فيه لغز ناقص لان الالغاز اعلاه 28 لغز باقي لغز الي يعرفه يعلمنا فيه

والله كنت أطلب جمهعا وتثبيتها لكن سبق الولد وكأنه على علم برغبتي ، الله يحفظه لك ويجعله رضياً باراً بك وبوالدته

	المشاركة الأصلية كتبت بواسطة ابوهليل

	والله الولد كتبها ولاحبيت اردها في خاطره لاكن للاطلاع فقط والحقيقه فيه لغز ناقص لان الالغاز اعلاه 28 لغز باقي لغز الي يعرفه يعلمنا فيه

اليك اللغز المفقود من السلسلة الرمضانية

عدد ليال الصوم للي حاضرين = الغاز فالمصحف تلاقي حلها
وشي فتاتٍ شابهت فعل الرجين = للي زعل والناس تشكي ذلها
سميها ينقال لشخص المتين = دور لها ياصاحبي دور لها

مشكور يابوفيصل لاخلا ولاعدم

تم اكمال الناقص الله يجزاك خير

كل عام والجميع بألف خير

أستأذن مستشارينا الأفاضل في وضع ترتيباً خاصاً بأصحاب الحلول الرمضانية

الذين شاركوا طوال هذا الشهر الفضيل في الألغاز الرمضانية المقدمة من

مستشار الألغازأبوهليل صح لسانه ولسان من شارك

وبحسب التسلسل والأوليّة والأكثر حلولاً من المشاركين كالاَتي :


الأول الكحيله / سبعة ألغاز رمضانية >> لغز (8) + (9) + (10) + (16) + (17) + (22) + (26)

الثاني حسين / خمسة ألغاز رمضانية >> لغز (15) + (18) + (23) + (25) + (28)

الثاني مكرر الأجرد / خمسة ألغاز رمضانية >> لغز (3) + (12) + (21) + (27 ) + (29)

الثالث أبوفيصل / أربعة ألغاز رمضانية >> لغز (5) + (11) + (14) + (24)

الرابع علي الزهراني / ثلاثة ألغاز رمضانية >> (7) + (19) + (20)

الخامس ابوفهد / لغزين >> (1) + (6)

السادس عامر الروقي / لغز >> (4)

السادس مكرر / سهم >> لغز (13)

السادس مكرر/ قبايل حرب >> لغز (2)



جميع من ذكر أسمائهم بعاليه من الأعضاء
ليس للأستعراض ولم يوضع ذلك لأي معياراً خاص أو قياساً للأفضلية
ولكن كان ذلك بقدر ماكانوا يشكّلون حضوراً رائعاً وجميل كان اِحياءً منهم لهذه الأيام المباركة
رأيت توضيح أسمائهم ليكون لنا وللجميع منافستهم في حلول الألغاز القادمة
في مثل هذه المناسبة المباركة ، ولمستشارنا القدير الفضل فيما قدّم
فــ له منا الشكر والتقدير على مابذله من جهود كريمه .

وبكل ود وتقدير دمتم كما تحبون

صح السانك يابو هليل وبيض الله وجهك

وسلمت يمينك

على الالغاز الرمضانية الجميلة المفيدة عشنا معها اوقات جميلة في الشهر الفضيل

تسلم يابو هليل يا استاذ المبدعين = تكتب لنا الالغاز وحنا نحلها
الغاز فالمصحف كما الكنز الثمين = حازت على اعجاب المشاهد كلها
تبقى لنا فالذاكره عبر السنين = واحة زهر / واحة شجر.. نستظل بظلها

وسلمت يمين ابنكم العزيز على جمع هذه الالغاز في متصفح واحد

ليسهل الرجوع لها والاستفادة منها بكل يسر وسهولة

فجزاه الله خير الجزاء واجزل له المثوبة

وجعله الله من عباده الصالحين

يابوفيصل قسم بالله قاعد اسجل الي حلو الالغاز اعلاه

وناوي اكتب اسماهم لاكن سبقتني وانت دايم سباق على الطيب
الله يوفقك ويسعدك يابوفيصل

مستشارنا الغالي حسين

اعجابكم محل فخري واعتزازي لاخلا ولاعدم والله يجزاك خير على الدعوه الطيبه

وصح لسانك على الابيات الرايعه

	المشاركة الأصلية كتبت بواسطة حسيـن

	صح السانك يابو هليل وبيض الله وجهك وسلمت يمينك على الالغاز الرمضانية الجميلة المفيدة عشنا معها اوقات جميلة في الشهر الفضيل تسلم يابو هليل يا استاذ المبدعين = تكتب لنا الالغاز وحنا نحلها الغاز فالمصحف كما الكنز الثمين = حازت على اعجاب المشاهد كلها تبقى لنا فالذاكره عبر السنين = واحة زهر / واحة شجر.. نستظل بظلها وسلمت يمين ابنكم العزيز على جمع هذه الالغاز في متصفح واحد ليسهل الرجوع لها والاستفادة منها بكل يسر وسهولة فجزاه الله خير الجزاء واجزل له المثوبة وجعله الله من عباده الصالحين

صح لسانك ابوعلي على الابيات الرائعه ويستاهل ابوهليل

	المشاركة الأصلية كتبت بواسطة ابوهليل

	يابوفيصل قسم بالله قاعد اسجل الي حلو الالغاز اعلاه وناوي اكتب اسماهم لاكن سبقتني وانت دايم سباق على الطيب الله يوفقك ويسعدك يابوفيصل

ولك مثلها يا ابوهليل مشكور

نحن جميعاً على قلب واحد وليس لي في ذلك فضل وانت صاحبه

احترامي