الشاعر/ناصر الزغيبي يمدح الذويبي

الشاعر الكبير/ناصر بن ضيدان الزغيبي الحربي

من كبار شعراء حرب في القرن الماضي, كان عليه دين وقال قصيدة طويلة وفي آخرها قال:

انشدك عن حمل الرجل ويش يخفيه=لا بيَنه ما فيه غـبر السنـيني
لا صار ما فوقه اهدوم اتغطيه=وبار العميل وقام حمله يبيني

يقصد بحمل الرجل:الدين.

وسمع القصيدة الشيخ/ فيحان بن ناهس الذويبي -رحمه الله- وتكفل بالدين وسدده.

فقال ناصر الزغيبي قصيدة طويلة يروي قصته وفي اخرها بين أن الشيخ سدد الدين ومدح الشيخ فيحان.

يقول ناصر الزغيبي -رحمه الله-:

فيحان بن ناهس الى حل طاريه=بأهـل زمان اليوم ماله حـتـيـني
هداج تيما ما تواني سوانيه=ما ينعرف ورده من الصادريني
يمنى تلم المال لاشك تفنيه=اما على الشرهات ولا القاصريني
يما عطا من عبد لو كان يشريه=مع حرةٍ تطوي الخلا باليـديـني
الطيب عقب عقاب(1) حاشه بياديه=لو كان عـقب عقاب به طيـبـيني
والعد يورد من جنابه وعاليه=والرس ما تلقى عليه القـطيني
والى اعترض في جاه(2) ما أحد ينافيه=يكفي عن الغياب والحاضريني

(1) عقاب الذويبي

(2) الشيخ فيحان أشتهر بجاهه يقول سبيل بن سند-رحمه الله-:

وفيحان إخو نوره تحت حد شلفـاه=كم فارس ٍ خـلاّ عظامـه حطايـب
اللي بجاهه يوم زاروا هـل الجـاه=رد الذويبي مـال رايـح كسايـب
ماخوذ غصب وضمّر الخيل تشعـاه=وشلون تنسى ياعجيـب العجايـب

رحمهم الله أجمعين وأسكنهم فسيح جناته.