الارشيف الجديد.....نايف بن مياس

ياحسين الوصف ياعذب السجايا=كل ماتطري علي اكتب قصيده
ومن نشدني ويش قصدك والنوايا=قلت هذي سابقه ماهي جديده
عذري الارشيف وايام الصبايا=وانت وقت راح ماتلبث تعيده
عن دروب الحب نوخت المطايا=مالقينا بالهوى سمعه مجيده
غير ذكرى بالصناديق الملايا=ذكرياته تاعسه وإلا سعيده
وانت سقت القلب من بين الحنايا=في حناة العود لين ارخيت قيده
مختلف والناس ماتعرف بلايا=والهوى بالمجتمع عيب ونقيده
.نسمع انه كان في وضح النقايا=واختلاف الراي من راي العقيده
متعب فكري ومنسوج الخلايا=لين وقف بي على حد الحديده
مدتي لك مثل مدات الطنايا=بالكرم مداتهم ماهي زهيده
لك شعور القلب من دافع غلايا=مار ليتك من شعوري مستفيده
عارض لك بالهوى كامل وفايا=وانت تامر ماتبيه وماتريده
ياغزال عاش في وسط الفلايا=كل مرعى يفتخر لاجيت بيده
كل قناص يوصي به وصايا=لو يعاود للمفالي مايصيده
ياحماة الصيد حطوله حمايا=سجلوها ضمن الانواع الفريده
نوع واحد مابقا منها بقايا=منقرض نوعه من سنين بعيده