الحضر يازينهم واما البدو حلوين حلوين

سلام واخذوا علومي ما جرى لي وسط بيتين = مااذم اهلها لكن اطباعهم ماهي سوية
البيت الاول طرقته ثم جاوب قال من وين = وقلت له ضيف قالوا مرحبا صبرك شوية
قام وفتح مجلس(ن) مقفول بابه فيه قفلين = ومدركينه عن النسناس والريحة زكية
والياه يبرق بريق وبوية المجلس بلونين = ومكمله بالمفارش والستاير والتكية
قام ودخل ثم جاب القهوة اللي كيفها زين = من داخل الترمسة ماهي دلال الشاذلية
وقدم لنا موجب الخطار محمي(ن) من الشين = سواه طباخ وسط السوق قبل يجاب ليه
والبيت الاخر طرقته ثم قال اقلط على الحين = مفتوح بابه وراع البيت يسرع بالتحية
دخلت وانه مشرع للاقاصي والموالين = اللي يجي مرحبابه فالصباح وفالمسية
تزينه بندق(ن) معلاقها وسط الدواوين = فالجنب الاخر مسدس كل واحد في نحية
ووجار مليان ودلال(ن) بجال النار ثنتين = فنجالها لادرج عندك عليه القابلية
والكبش بنت الرجال تصلحه في العسر واللين = ماتقول ودوه للطباخ لايدخل عليه
هذي علومي وانا ماجيت ادور جيم للسين = ابديت مالاح لي من علم والنية مطية
مابينهم فرق ماغير السواير والقوانين = سواير الحضر والبدوان كلن له شزية
الحضر يازينهم واما البدو حلوين حلوين = احبهم كلهم ماجاتني منهم خطية
لكني انا بديوي عشقتي طبع البداوين = اموت عند البداوة والمشاريب العذية