يا بنت ياللي لابسه عقد الالماس ... لا تلحقيني لوم دونك ذيابه

يابنت ياللي لابسه عقد الالماس = لاتلحقيني لوم دونك ذيابه
ودي ولكن وش اسوي بها الناس = يمكن على شأنك تقوم انقلابه
صحيح احبك حب وافي على ساس = مير الليالي ماوراها طلابه
كم فرقت غالي وكم غيبت راس = وكم سببت جرحن عطيب مصابه
واليوم ثار كليب مع روح جساس = وش حيلتي وانا عليه رقابه
لاني بلا واشى ولاني ببلاس = اخاف رب الكون واحسب حسابه
عفه ومحشومه عن دروب الادناس = لكنه امرن ربي اللي مضا به
يلج في صدري من الغبن هوجاس = علمن بوسط القلب محدن درابه
اخفيه واخذ مع طواريه مرواس = ويصورك بين القلم والكتابه
حبك بحر مايقربه كل غطاس = وحبك مرادن سعد من هو شقابه
والله مالك بالبشر وصف واجناس = هذي حقيقه والمعاني تشابه
لكن عليك الهون لاباس لاباس = خلك يالين الجو يصفى ضبابه