ديوان الشاعر//فايز المحيسن المعبدي

هذي القصيد مني مرسله لشاعر القدير سعد المحمدي
وقلت فيها

مايشيل حمّل شعيل عشرين مفـرود =من وقتنا الحاظر وعصـرً قديمـي
مال الحمول الكايده غيـر صمهـود =اللي يشيل الحمّل صبـره عظيمـي
ياهاجسي انقاء المزاين مـن الـذود =خبري بذودك مثـل ذود الطهيمـي
اليا عرضت جوف المزاين لها زود =فالمركـز الاول بـهـا تستقيـمـي
محميـةً عـن كـل ناقـد ومنقـود =مادام حرف الجزل وسمت وسيمـي
عدّ الوفا لهـل الوفـا دوم مـورود =منهم سعـد يالسعـد فالـه حشيمـي
شاعـر مفـوه فالمياديـن مشهـود =له حرف عاشق للجزالـه حكيمـي
نعمين ياسيفً على الحـق مجـرود =سيفً مضاريبـه بحكـم الزعيمـي
وسلام يالشاعر ترى اليوم مقصـود =مثلك يعرف القصد ماهـو غشيمـي
حرً ولك منزال فـي عالـي النـود =واليوم في منزلك وضعـك سليمـي
باسالكم عن علّم حاظـر وموجـود =ونبغا الإفـاده يالخـوي فالصميمـي
مثل( السحاب اللي معه برق ورعود) =يسقي وحيـي كـل عـودً هشيمـي
كان البخت والحظ عيا بهـا يجـود =لآ شفت نوض البرق قلنـا كريمـي
ولامن تبين بيـت مبنـي ومهـدود =امهندسه مخطـي وجابـه حطيمـي
انعاتـب المخطـي ونرميـه فقيـود =والآ نسيبـه فـي بلدنـا مقيـمـي

هذا رد الشاعر القدير سعد المحمدي
وقال فيه

يامرحبـا عـداد ماهبـت النـود =والذ من تمر الحسـا والقصيمـي
ببيات شاعر بين الاجواد محمـود =راجح عقل شهم وشجاع وحليمي
بقسم القوافي له بصامات وجهـود =مشرف مثالي كل نهجـه قويمـي
ربعه هل الردات لاثـار بـارود =ياما وياما نزحـو مـن غريمـي
لهم مواثيـق وقوانيـن وعهـود =في رايهم مايشاركون الحريمـي
يافايز الدعوى بها نزول وصعود =لقيت من ضمن السيوف القديمـي
شوفي بعيني ياسند كل مضهـود =ياكبرها مابين ضيـف ومقيمـي
من جابها عساه مايكسـب الفـود =ماسدت الرقعـه فتـوق اليديمـي
عساك تفهم كل غايـه ومقصـود =مبغاك تحت السين تبحر بجيمـي
خل الطريق اللي مشيناه مسـدود =عن شرهة العاقـل وذم اللئيمـي
وعن ماذكرته عالج الوضع بركود =عشان ماتبلـش بواحـد سقيمـي
تبلش يافايز فيه بالسـوق والقـود =غشيم في شعب المشاكل يهيمـي
ماتنعدل ياصاحبي عوجة العـود =صياف قبلـي قالهـا للعصيمـي
خل التعامل يالمحيسن له احـدود =قبلك تعب دكتورهـا والعميمـي