ديوان الشاعر//فايز المحيسن المعبدي

هذي القصيد كتبتها في ملتقى حرب الرسمي ورد عليه الشاعر القدير بخيتان البشري
اقول فيها

سلام يامجلس على نهج الاجداد=لاشك ماتخلـو مـن الشاذليـه
هاتولي الدله وشاهـي و بـراد=وهاتو عشايه مثل عيد الضحيه
اليوم ياصحابي على الملح والزاد=أشرح لكم بعض المعاني الخفيه
اللي لها فالصدر بـرقً ورعـاد=والمزن مردم فوق نجد العذيـه
النجمه اللي مشغله بعض الافراد=لاشك ماهي من نجـوم الثريـه
مادام تفتح باب ناقـد وحسـاد=فالمجتمـع تظلـم نوايـا بريـه
ياجعلها ماتعود لديـار الاجـواد=باسج عنها في شروح القضيـه
يامجلسً فيك العدل جيت نشـاد=ابغا علوم اهل الوفـا والحميـه
فيني هواجيسً وبحـرً وصيـاد=وفيني حروف الشعر والأبجديـه
وفيني ملك مالك ومملوكه الظاد=يشوم عن نهج العلـوم الرديـه
يدور الجزله مـن بـلاد لبـلاد=لو كان مايرحل يحـث المطيـه
الشيخ قوقل مايقصر فالأرشـاد=كريـم يمنـا شهرتـه عالميـه
حنا فوقت العولمه وكثر الاعـداد=والنـت والابتـوب والنرجسيـه
هـذاك نجـارً وهـذاك حــداد=وهذا ولد دنـدون مافيـه زيـه
ودنيا تقلّب كل يـومً لهـا مـاد=راعي الحساني ينجزي بالخطيه

وهذا الرد من الشاعر القدير بخيتان البشري
وقال فيها

يامرحبا ياللي علـى الطيـب معتـاد=حياك فـي مجلـس رجـال الوفيـه
اقلـط بـدارك والمباهـيـر وقــاد=من تحتهـا جمـرٍ بـه النـار حيـه
يالصاحب اللي جيد الساس لك جـاد=حسب الذي حبر القلـم جـاب طيـه
ياللي بديت الحـون قافـك والانشـاد=شـرح المعانـي بيـن ذيـه وذيـه
النجمة اللـي بازغـة مالهـا اسنـاد=لـولا المجامـل ماتبـان الخفـيـه
العلـم لـه فُقـاد والـدرس نُـقـاد=إن كـان شافـوا مانكتـب فالشكيـه
وانتـه عليـك آمـال ياذيـب عُقـاد=ومثلك كفـؤ مـن يعرفـك واهنيـه
ما يتفق ضدين فـي حكـم الاضـداد=لابـد مـا نحسـب لضـد وخويـه
وكان المعاني ما لهـا حـرف جـلاد=ماتنعـطـى نجـمـة ولامزهـريـه
والكـل شاعـر قـاف والـورد وراد=وجـزل المعانـي راح عنهـم نحيـه
وكلٍ علـى مدلـول فكـره والايـراد=اللي غرف مـن جـم واللـي ركيـه
ومن لابفكره فـاد لـو جـاب مافـاد=ياخذ عـواري حـق غيـره عطيـه
وترى العدد فـي وقتنـا قـام يـزداد=لكـن ابـو نيـه بهـا فـاز نـيـه
ومـادام للمشـروع داعـم وسـداد=ياكثرهـم وسـط البلـد سمكـريـه
شعرك يا ابو ماجد على روس الاشهاد = جـزل المعانـي لـك عـدودٍ رهيـه