أستمر العزوف =================

محمد العمري=
كثرت علينا المشاكل واستمر العزوف=يامن يجيب الخبر بالقسم وين أهلـه
الوقت دوار والدنيا وراهـا ظـروف=والظاهر ان العرب كلن يسوق أجمله
محمد البدراني=
به ناس للمشكله دايم تدق الدفوف=والعلم هاته واقول القسم هذا ازهله
والوقت دوار فعلا والله انه يروف=واللي يسوق الجمل لاجا هنا يعقله
محمد العمري=
ماني معلمك وأنته لك عيوناً تشوف=وشعيل راع السوالف ماحدن يجهله
فيه الائمه ثلاثه مير مابه صفـوف=مابه صلاتاً تتم والصف ما نكملـه
محمد البدراني =
طيب وش تشوف يوم انك تسوق الحروف=وشعيل وسمه بخـده مـار مـن جفلـه
ومرات واحد يفيدك بيـن جمـع الالـوف=ولا تصلـي الا لربـك والعمـل يقبـلـه
محمد العمري=
اشوف لي واحدن يمي يحد السيوف=واليوم رح وانشده ثم قول من مزعله
عزالله انك تجيب العلم ماأنت بزهوف=لكـن محمـد وراه مغيـرن منزلـه
محمد البدراني =
هذاك ودك بذبحه مثل ذبـح الخـروف=وعلى المجنن قريت الكهف والزلزلـه
لين اذعنت لي وصكت بالخدود الكفوف=وعلى حسب رغبتي وعد الرهى ندهله
محمد العمري=
عزالله انك ولد صاطي ولافيك خـوف=يكفيه يوم العلم حطه بـراس اجبلـه
أنته وانا عارفين اللي بوسط الظروف=لكن فيه ناس ماهي عارفه المشكلـه
محمد البدراني =
بعض التعب ياعميلي ياعساه مخلوف=والحبل لا لاتشـده واحـذر المحبلـه
اللي يعرف الحسا وكاد يعرف الهفوف=وناخذ من الفايتـه ادروس للمقبلـه
محمد العمري=
ما دام حولت به بشدادها للردوف=تسلم يمينك وخل احبالها مقفلـه
وضنتي ياطول العمر مابه حسوف=لكن به عقرباً تبغا لهـا سلسلـه
محمد البدراني =
الطيب ماهو حسافه عند رجلٍ عروف=يبقى وغيره يروح الخانـة المزبلـه
وكلن يقديه عرفه وان نويت النكوف=اقنـدك يامحمـد دلــه مهيـلـه