ديوان الشاعر/ سعد المحمدي

من فوق جيبٍ معتنـي بـه خبيـره=متعـدي الإلفيـن باربـع موديـلات
ناقيـه مـن جملـة جيوبـاً كثيـره=وسجلت شيكه بعد شفت الضمانـات
أوراق فحصه وقعـت مـن مديـره=فاحص عليه مهندسـه بالجهـازات
اجتاز كل الفحـص قبـل الظهيـره=ومن المـرور مخلصينـه بلحظـات
ارسلت من يقطـع عليـه المسيـره=مايمل لو طالـت عليـه المسافـات
لاقلـت تكفـى ماتعـقـد نظـيـره=ضاري على مشي الدروب البعيدات
قدام نـور الصبـح يطلـع نذيـره=مشي عسى ممشـاه كلـه سهـالات
غير الكتـاب وسايقـه مـع سبيـره=عليـه ماحطـت حمـولاً ثقـيـلات
ياسايقـه لاجيـت ذيـك العشـيـره=عيـال وايـل كاسبيـن الجمـالات
ستر العذاري فـي نهـار المغيـره=لا سيقت العطفه ولجـوا بالاصـوات
فوق المهـار وبالسيـوف الشطيـره=ياما خذوها غصب ماهـي حيـالات
يجذبك يـم معشـي الضيـف نيـره=الخمعلي ريف الركـاب الهزيـلات
عليـه سلـم لـي مدلـه قصـيـره=وعطه الكتاب اللي معانيـه جـزلات
خلف زبون اللي ظروفـه عسيـره=ان حدتـه سـود الليـال المخيفـات
يا لخمعلي جاني على الشعر غيـره=كثـرت قنواتـه ونشـر المجـلات
كلاً علـى الساحـه يدرهـم بعيـره=اهم شي ايشـاف باحـدى القنـوات
نشوف ياريـف الخـوي يامجيـره=اللي على الشاشات يظهر على الشات
لاقلت ماهذا الشعـر صـرة عيـره=وقالوا زمان اللي تبي ياسعـد فـات
حاسـوا وداسـو يالثبيتـي مريـره=اجسام دون عقول فـوق المنصـات
وامثالكـم شعـار شبـه الجـزيـره=اللي لهـم علـى معانيـه بصمـات
محاربيـن مـن الوجيـه الشريـره=والعذر عصـر العولمـه والحدثـات
اعـذار يامشكـى عمـي البصيـره=معادلـيـن الطيـبـه بالـرديـات
قلتـه وانـا يالقـرم مانـي سفيـره=ولاقول فيه ارقبت روس الطويـلات
ياناضـمـه يانـاقـده ياخـبـيـره=وجهة نظردونتهـا وسـط الابيـات
رايك عسى رايك لنـا فيـه خيـره=حيثه يجي صايب والافيـه هفـوات
حنـا نجيـب الاولـه والاخـيـره=ولاالسكوت اخير في بعض الاوقـات
والعـذر منكـم يالوجيـه النويـره=اليا حصل تقصيـر منـا وغلطـات