ديوان الشاعر/ عبدالله عبد الرحمن نغيمش الفريدي

العبرة اللي لنوم العين سراقه=مثل فراق الحبايب ليت افارقها
إن حولت من رموش العين حراقه =وإن استكنت ورى عيني تضايقها
نوم العرب لو سليت لعيني شفاقه=وليا تذكرت دمع العين غرقها
يالايمي كف لومك ما ابي إلحاقه=يا تلزم الصمت يا اكسكيوزمي سقها
شف حالي اللي براها البين وارقاقه=واسمع شهيق العباير يوم الا حقها
علي الذي مالي بنسيانهم طاقه=زينة حياتي ولذتها ورؤنقها
افراقهم ما يبيلي فوقه اغلاقه=يكفي بروحي يوردها مشانقها
آخذ مع الموت كتم انفاس وإيفاقه=خيالهم لا لثم روحي وعانقها
انا اشهد الروح شفقانه ومشتاقه=والاذن عن مايقولون العرب صقها

في حمى الرحمن ياللي مجافيني=ياعسى لوتقطع الوصل مصيونه
لوجفاني قرة العين مغليني=خابر قلبه بفرقاي وشلونه
فرقتنا سود الايام مبطيني=وا عذاب القلب ياما اكبر اغبونه
الرجا مقطوع من بينه وبيني =حالت الاقدار والحظ من دونه
ماخذيت اكفايتي منه بالعيني=ماحصل للشوف يشبع على هونه
مار له صورة بعيني اتكفيني=بين طرف العين والعين مركونه
وله خيال كل ما امسي يمسيني=فيه روحي كل ما امسيت مفتونه
مانسيت الزين لوتبطي اسنيني=سيرة اهل الحب وامشي بقانونه
من يخون الود ماهو على ديني=والله اني حافظ الود ما اخونه
سبلي يادمعتي لاتكنيني=لا متى وانتي ورى العين مكنونه
مابها منقود بين المحبيني=سنة" بفراق الاحباب مسنونه
خففي عني مصابي وسليني=لو مصاب الحال ماهوب ياهونه