ديوان الشاعر//فايز المحيسن المعبدي

البارحه مانمت ولاطابلي فراش = اورد اهجوسن لفتني معاطيش
ورد الهديد اللي من القيظ عطاش = تارد عدودً ماوطتها المطاريش
ولاوارده سبعً ولاراعي ادباش = عدً رهاوي صافين مابعد نيش
يسقي حروف الشعر ويزيدها انعاش = ويبني بيوتً غاليات المفاريش
حرفي جويد حزام متحزم كلاش = صواب رميه للهدف دوم مايطيش
حرً على صيد الجزيلات معتاش = طيرً وحش مانقلوه الدراويش
انضم بيوت الشعر واسوقها كاش = فسوق الجزاله مانجيب التناتيش
اما قصيدً يجبر اصحاب الأفلاش = اتصور حروفي بلا (واو ) تغشيش
ولاعساه يموت في داخل احواش = ويبقا مخبا في كهوف الخفافيش
راس الظبي قد قيل مافاد عراش = مايسدله جوعً ولا به عراميش
من بعدها يامرحبا عد ما شاش = راسً على درب الوفا دوم بيشيش
في ملتقى اللي جارهم بالوفا عاش = مافيهم الكاذب وارع المغاشيش
معبّد أهل الطيب حرابة الواش = فوق الأصايل ماعسّفو للأكاديش
كم معتدي جاهم وعود على ماش = يسحب وراه الذل ومّنتف الريش
ماني ردي الحظ ولاني ولد لاش = من سابق الأيام حنا هلل الجيش
جدي سعيد اللي غزى قوم الحباش = مع السعودي حررو واديً بيش
وقت الوغى واجه ولافر منحاش = وصفّو ديار المملكه من البشابيش
بقيادة الفيصل حكيمً قوي جاش = رزّ البيارق فوق حمر الطرابيش
كريم يمنا قلبه أبيض من الشاش = مثل الحياء اللي نوض برقه مراهيش
سعيد أبن ماطر عسا قبره فراش = روضه من الجنه بها طايب العيش
هذي حقيقه مابها جدال ونقاش = صوره من التاريخ ماقلتها طيش
ولاعاش راسً للوطن دوم غشاش = ياخذ رشاوي تحت بند البخاشيش
بايع ضميره مرتكيله على قشاش = يخشى ليا قالو لجان التفاتيش
جعله هشيمً معترض درب قراش = ويقتشه اللي سارحً فالمغابيش

سبحان منهو فارق الناس عن نـاس = وخلآ التعامل فالبشر طيبـة أسلـوب
بعض البشر ما فقلبها ذرة أحسـاس = وبعض البشر بحساسها تملك قلـوب
وكُلاً على ساسه من العـرق دسـاس = ومن حبه الله صار لنـاس محبـوب
طيب ونباء ياحـي فالـه كانبـراس = من نور وجه كّنـه البـدر مجلـوب
والياء حكى نسمه من الطيب نسنـاس = ما تقول غير الشهّد من فّيـه مسكـوب
ماودك الآ تحطه عّمه علـى الـراس = غالي ثمن وغلآ الذهب مصبوب
وغلآ من الجوهر ويلمع كما ألماس = فيه الوفا والطيب لنفس مرغوب
والطيـب مايكسـب بدرساً وكُـراس = ولاهو بضاعه فوصط الاسواق مطلوب
وهبه من الله مدبـر الكـون بقيـاس = يوهب بها ناساً ومن نـاس مسلـوب
اللي أنسلب منه ترى وضعه أنحـاس = الناس ماترغب علـى مقابلـه نـوب
دايم على طبع القشر مالتمس مـاس = راعي دسايس وللغـدر سالـك دروب
لنه ضعيف النفس والحقد له سـاس = مايخاوي أهل الطيب والوجه مشحوب
ولاله مع أهل الجود مرتع ومجلاس = ولاينذكر بالخير ماغير بعيوب
عيباً عليه كان بطرق له أجراس = ويحرم عليه منه نشرب لمشروب
ياجّعل مايبرى لياء صابه الباس = والآ يتعثر من شفأ عالي النوب
وسبحان منهو فارق الناس عن ناس = وخلآ التعامل فالبشر طيبـة أسلـوب
بعض البشر ما فقلبها ذرة أحسـاس = وبعض البشر بحساسها تملك قلـوب

ياذيب فوق الرجم جريت بعواك = مدري لحقك الجوع او شوق خلك
ياليت نعلم وشهي اسباب دعواك = وش الذي محرق فوادك وعلك
ياذيب حنا اذيابه مثلك وشرواك = نفزع معك ياذيب وبالرائ ادلك
ان كان ياذيبن من الجوع شكواك = ولافيه من ينشد وش اللي حصلك
وعواك رجوى لي ماتخيب رجواك = والله لاجيب ام العصيب فمحلك
رزقي ورزقك قاسمه رب الافلاك = مابيتك طيان وبالظين ازلك
لاطاء على انياب الفاعي والاشواك = حافي القدم ماهمني لين أصلك
جاك العشاء مادم نابك ماعشاك = ولو طالت الجيره ترى مانملك
وان كان ياذيبن من الشوق بلواك = قرب عليه جاي واسمع بقلك
ياهل ترى خلك يحبك ويبغاك = ولآ على شوقك ماياوي لغُلك
هذا البلاء لن كان خلك مايدناك = وانته متيم حيل والود ذلك
يضحك لكم سنه وبالسن اغواك = ولا يوم قلبه فالموده يجلك
لآوالله الآ بّيبلش الطب فدواك = تبطي وجرحك فالحنايا يعلك
وان كان ياذيبن يعزك ويهواك = وين الدروب اللي تودي واشلك
ابشر بعزك تاصل ويسكت عواك = واخذ الوعد من شاربي شوف خلك