ديوان الشاعر... فواز الزويهري

ياقوافي الشعر يابيـوت الجزالـه=لاعبيني فالطريـق اللـي طويـل
هاض هاجوس الزبيدي بالعجالـة=يردف المعنى على المعنى الجميل
راكب اللي ما يبـا راع الجهالـه=خيل تجمح داخله تصهل صهيـل
صنع نصراني خبير (ن) في مجاله=حس سلفه يطرب اللي له محيـل
مع رفيق(ن) قرم كساب الجمالـه=لاكـذوب ولا جبـان ولا بخـيـل
مثل صقر(ن) حر مايرخي سبالـه=ما يسير إلا على نهـج ودليـل
فاتل الشارب منكس فـي عقالـه=يبـري العلـه ويـوزن للعميـل
يارفيق الخير صاحبـك احتمالـه=شح والدنيـا علـى مثلـه تميـل
ويش معزب ناقصه دايـم دلالـه=لا طبخها بـن مـا بهـر بهيـل
ليتنـا جزنـا ولا جينـا حلالـه=ولا نظرنا ويش معه باقي حصيل
صح ..ولد البوم مثلـه فالسلالـه=والخضير محال نسله نسل خيـل
قالها اللي ما مشى درب السفالـه=ولا تكلم فـي فـلان بقـال قيـل
وجدي الليله علـى راع الأصالـه=الكريم العاقـل الشهـم الأصيـل
الـذي رام العـوالـي بالنبـالـه=والمدايح حـق فالرجـل النبيـل
الذي عز الخوي وأثبـت حبالـه=سهل فالممشى وفي رفعة سهيـل
زبن منهو في جـواره بالكمالـه=يفرج الضيقـات لطـام المعيـل
في دياره مـا ذكرنـا قـط حالـه=صح نسل الذيـب مثلـه فالفعيـل
قالها الحربي زبـون لكـل طالـه=ربعه الشامـات كالبحـر المهيـل
الزويهر يوم غنـى فـي مقالـه=حط فوق الجـرح بلسـم للعليـل
يفهم الفاهـم ويجهلـه الحثالـه=كيف يفهم فالمثـل واحـد هبيـل
ياحروف الشعر يابيـوت الدلالـه=كل جيل(ن) عنك يفرق فيه جيـل

ياهجوس الشاعر اللي لا لفاه الشوق غنا=ينثني مثل العويد اللي تثنيه النسايم
ياهبوب الشوق ياللي جيتني بعطر المهنا=من سبب عطرك غذا قلب الأسد بالود هايم
لا اصطبح مثل الأسير ولا غشاه الليل ونا=صاحب النجم اليماني يوم خال الفكر نايم
من خشيف الريم يوم الريم سير في وطنا=ليت وإنه مادرج بخطاه في ذيك الحزايم
كنه البدر التمامي يوم جانا ويتثنى =قبل يوصل ريحه مسكه يسبقه شجي الرخايم
من عيونه صاب سهم الود في قلب المعنا=ولا تبسم كنه البراق يلمع فالعتايم
أهيف الخصرين زين الرسم مامثله سحرنا=عذب حرفه ..وجود كفه ..ماتخليله لوايم
طيب المنسب كريم الطبع ما يوم(ن) تدنا =من فراقه ضاقت البيدا ..وجو الود غايم
ياطوير(ن) فوق دار الريم حلق لا تونا=بلغه مني سلام ..وقول لا ذلحين صايم
واشرب بكاسه لعل الطيب من كاسه يصلنا=يمكن انذوق الذي ذقته ونذبحلك تمايم