ديوان الشاعر(تركي عبد الله البشري)

بخيتان=
في شوق له حيل مشتاقي = عيني تشوفه ولا اقوى فيه
هو صحيح الأمل باقي = فيما بقوله وما يُضنيه
تركي=
أكشف لنا بعض الاوراقي = وبين لنا العلم لا تخفيه
قدام لا لحظة فراقي = تكُتب نهاية لحن تُشديه
بخيتان=
كيف أكشفه داخل اعماقي = وأنا فذاته حكم قاضيه
حجمه فعيني له آفاقي = حجمي فقلبه زمن طاويه
تركي=
شارقتنا بعلمك إشراقي = ياراعي الطيب ومذريه
بأنشدك عن خُضر الأوراقي = ولأهملته الزرع من يسقيه
بخيتان=
ياصاحبي ما أنقطع ساقي = قــدام يضمأ أنا أرويه
اليا نطق بالهوى شاقي = وإذا سألته عليّ يخفيه
تركي=
ياصاحب المركز الراقي = لا باس وانت رجل نغليه
القول ياتي له اللحاقي = في حال أُرفق لنا تنويه
بخيتان=
أحس صدري معه ضاقي = وأحيان ماسمع على طاريه
( لابُعد لاقُرب لا فراقي ) = لكن وجوده على مافيه
تركي=
دمعي وقف داخل حداقي = مما بكم ياجناب البيه
مكتوب ماعنه مدراقي = عمرك كذا أنكتب تقضيه
بخيتان=
بالله لا تضيق اخلاقي = كان الأمل شرط لي تبديه
لو الذهب جبته اطباقي = غير الأمل شي لا تطريه
تركي=
حتى الأمل دون برّاقي = بالطول بالعرض ما يجديه
ولا لك مع الناس ترياقي = غير الأجر ربنا يجزيه
بخيتان=
على الملأ يعلن إحراقي = فبداية الأمر وافق ليه
هيا إشهدوا فيه يارفاقي = جرحي نزف يرفض يداويه
تركي=
ما أضن يجديك إشفاقي = مصير حُتم على راعيه
مذكور في كل الاسياقي = عن فاقد الشيء لا يعطيه