ردي بالنيابه

13-03-10, 06:10 PM

السلام عليكم ورحمة الله وبركاته هذي القصيده وجهها الشاعر معجب المحمدي الى احد
الجماعه فهو ليسى شاعر وطلب مني الرد على معجب فرديت بالنيابه عنه

يابجاد لوتدري عن الحـال يابجـاد=فزعـت ليـه ياعريـب المجانـي
لاعاد راي مغيزل العيـن لاعـاد=ياليتنـي ماطعـت جـال الثمانـي
وش عاد لو سويـت دلـه وبـراد=وكثرت فيها الهيـل والزعفرانـي
واقلبي اللي كن به صفـق حـداد=يفر من بيـن الظلـوع الحوانـي
طار الكرى والنفس ماتقبل الـزاد=واقوم واقعد من مكـان المكانـي
من يوم ما شديت من دار الاجـواد=وسكنـت دار مطوليـن المبانـي
ربعي هل الطولات ماضين الامجاد=عـز الرفيـق وجارهـم مايهانـي
كم ليلتن جوني على غيـر ميعـاد=يازين شوفت ذا بحيـن السمانـي
كسابت المعروف من عصر الاجداد=في وقتنا الحاضر وماض ٍ الزماني
محبـة الغاليـن بالقلـب تــزداد=ويكنهـا قلبـي وينطـق لسانـي
ساكن غلاهم داخل القلب من غـاد=واعزهـم والله معـزت اخوانـي
والله لو رحنا ورى ديار الأكـراد=لازورهـم ساعـات والا ثوانـي
بأمر الكريم اللي له الخلق سجـاد=اللـي نعبـده بالخفـا والبيـانـي

ردي

سريا قلم وأكتب من الشعر مافاد=سجل وعجل يـاالله المستعانـي
ماني موردها على غير ميـراد=لاصار مابعض الامور أتخفانـي
شاعر وبا أجاري من الربع قصاد=لوكان ماوجـه علـي المعانـي
موجه لبجـاد وانـا عـن بجـاد=الله على زيـن الكـلام يهدانـي
مية هلا ياساس حاميـن الاذواد= يوم القبايل بين خوفٍ وماني
دنياك يامعجب بها كـون زهـاد=مافوقها ياراعي الطيـب فانـي
كم فرقت مابين الاخوان واحفـاد=الضا من الله ماعليهـا ضمانـي
إليا دبرت تسقيك من كأس الانكاد=وليا قبلت فيهـا تجـر الغوانـي
قبلك بها ذقنا المـراره بالاكبـاد=لعبت بنا لعب الرشـا بالسوانـي
يوم بتبوك ويوم بحـدود بغـداد=مصيرنا مجهـول يالمودمانـي
ولا انت منته من ورى دولة تشاد=ليا ذنوا سمعت صـوت الاذانـي
حذفت عصا لعل تخدمك الاولاد=ولامت مسكانك رفيـع الجنانـي
من طاوع الثنتين ماعنـه نشـاد=ونته طاوعت أياتهن يالحصانـي
شد الحزام وقود من قبـل تنقـاد=لا ينفلت منك الرسن والبطانـي
نمزح معك لاتخذ المزح من غاد=ظاهر عن الشكات سر وعلانـي
أنته تريـد ويفعـل الله مـاراد=اللي اليامنه ومـر كـون كانـي

13-03-10, 06:21 PM

صح الله السنتكم جميعا

ابدعت يا سعد لا هنت

وبيض الله وجهك يا الغالي

تقبل مروري ودمت بخير

13-03-10, 06:27 PM

صح الله السنتكم جميعآ

وبيض وجهك ياسعد دائم وانت راعي الفزعات يالمحمدي

13-03-10, 06:44 PM

الشاعر معجب المحمدي

صح السانه

مليون

وصح السانك

ياالشاعر سعد المحمدي

مجاراتك و ردك يطلق وجهك

وافي وانت من اهل الوفا

والعلم الغانم

تقبل اعجابي الشديد

بما تكتب

13-03-10, 06:54 PM


	المشاركة الأصلية كتبت بواسطة عماد القرافي


	صح الله السنتكم جميعا ابدعت يا سعد لا هنت وبيض الله وجهك يا الغالي تقبل مروري ودمت بخير

صح بدنك يالغالي وبيض الله وجهك على المرور

13-03-10, 06:55 PM


	المشاركة الأصلية كتبت بواسطة أبو مالك


	صح الله السنتكم جميعآ وبيض وجهك ياسعد دائم وانت راعي الفزعات يالمحمدي

ماعليك زود يالغالي تحياتي وتقديري

13-03-10, 06:58 PM


	المشاركة الأصلية كتبت بواسطة عبدالله عتيق الحنيني


	الشاعر معجب المحمدي صح السانه مليون وصح السانك ياالشاعر سعد المحمدي مجاراتك و ردك يطلق وجهك وافي وانت من اهل الوفا والعلم الغانم تقبل اعجابي الشديد بما تكتب

شاعرنا الكبير عبدالله الحنيني
مرورك شرف لي وشهادتك اعتز فيها وتبقى وسام على صدري
تقبل تحياتي وتقديري

13-03-10, 07:00 PM

والله قصيدتين جزلات من رجال جزلين وهذ القصيد اللي يجب تسجيله وحفظه
صح لسان بجاد وسعد

13-03-10, 07:30 PM


	المشاركة الأصلية كتبت بواسطة ابوخالد الفريدي


	والله قصيدتين جزلات من رجال جزلين وهذ القصيد اللي يجب تسجيله وحفظه صح لسان بجاد وسعد

منك يابو خالد نتعلم وشهادتك تاج على راسي تقبل تحياتي وحترامي

13-03-10, 07:50 PM

صحة السنتكم جميعا
قصائد جزله من رجال
الجزاله 0 وافين
تقبلا تحياتي