مجاراة الشاعر/ عبدالله بن عون

12-03-10, 07:09 AM

هذي مجاراه لقصيدة الشاعر الكبير عبدالله بن عون اللي يقول فيها

يامل قلب يسج وفيه دولاجه=من واهج بالضماير قام يدرجها
في معزل عن جميع الخلق وازعاجه=مااسمع من الناس لو تكثر لجالجها
ماغير اهوجس تقول مضيع حاجه=وآخذواسند على روحي واهرجها
وادوج لوكان مارجلي بدواجه=ادله النفس لين الله يفرجها
يالله ياللي بيدك الضيق وافراجه=ياخالق الخلق ياقاضي حوايجها
تفرج لعين ليا هامت بسوهاجه=تجهز عليها الطواري لين تزعجها
بالصدر ضيقه ونوم العين هملاجه=عيني من العام والسهر متولجها
نوب سهرها شديد ونوب نهاجه=مر تكن الدموع ومر تزعجها
عليك ياللي بقلبي كن وهاجه=وهاج نار هوا الغربي يسارجها
راعي ثمان تشاد اللولو لعاجه=كن البرد يوم يضحك في مفالجها
ياروح روحي وجرح القلب وعلاجه=الطف بحال عليك الهم ساهجها
قلب يناجيك بسلوم الهوا ناجه=يشكي لك الحال داخلها وخارجها
اما التفت له وتم الوصل بمواجه=والا بلا عشرة هذي نتايجها
وش ينفعك من حنين القلب وخلاجه=وجروحنا اسبابها انت ولاتعالجها

المجاراه

عزي لقلب كتوم وقفل ادراجه=حالف ملفات همه مايخرّجها
حط القفول ودبلها فوق مزلاجه=ثم دور ابعد بحور السر وادلجها
رمى مفاتيحها في غبة امواجه=من خوفه النفس لاتبدي حوايجها
صابر ولونفسه لشكواه محتاجه=ويكابر ونفسه بنفسه يعالجها
طاول سنينه وهمه زاد بانتاجه=وبقعا وصكاتها طالت عجايجها
لين انها طارت ادراجه ورا سياجه=وخافي ملفاتها بانت مناهجها
بانت مناهج هواه ولابقا حاجه=الا كثر ماتبين يامبرمجها
لي مهرة هايبه والناس لجاجه=وانا مابين الثنين اجرح واعالجها
لولا غلاها ولولا الخلق هراجه=يمدي من العام عاسفها ومسرجها
لوجابو الزين من دلهي لقرطاجه=ومن انقره للولايات وبوارجها
ثلاثة ارباعهن تقعد على الصاجه=واللي بقت تقضي بلفتة تغنجها
يامسافره ركبكم لايطفي سراجه=لين اننا ناصله ونشوف ناتجها
اما خذينا علاج القلب وابهاجه=والا ترى اكفاننا بيبيع ناسجها