ديوان الشاعر// عبدالعزيز بن حمود ابالعون

القلم ماجود والساعد طويله = وأنا ليا غنيت ما ني مسنحاني
كل وادي يتبع مجراه سيله = والحساني ما جزاها إلا حساني
راكب اللي تو ما جا مديله = مار كان جميح وإلا بهبهاني
تو ما جابه من الخارج وكيله = بالوكاله ما بعد جوه الزباني
يستخف القلب يوم يطير ويله = لون مش السيل والمركب لياني
كنه الصاروخ يوم اهتز ويله = ما يحاسب للرفاع وللطماني
ما عليه الا الدريول والدليله = نبا على الجمس نزف التهاني
للشيوخ اللي يفكون الدبيله = كان صار العلم دونه علم ثاني
يفعلون المعجزات المستحيله = وذي عوايدهم ليا شان الزماني
السيوف اللي بيمنايه صقيله = يقطعن الراس بالحد السناني
أصلهن مفهوم من ساس وفصيله = كاملات أوصاف من كل المعاني
على راس حجاب زيزوم القبيله = شيخنا اللي يوم بان العلم باني
أنثنى من دونا وإشتال شيله = يدفع الشيكات ما فيها مثاني
كل ما نوخ لحملٍ يرتكي له = لو يصير الشيل فيه عويرجاني
شال ما شال البليهي عن زميله = مثل هديب الشام ما يعرف التواني
ما عليه من الخفيفه والثقيله = يوم بانت بتها بأربع ثواني
انتهى الموضوع والحاله جميله = والله اللي معتني بالمودماني
ما لنا لولا الولي قدره وحيله = مار رحمنا الرحيم المرحماني
انتهى الموضوع بجهود ووسيله = بين وجيه الخير والربع العواني
ربعي اللي ما بهم نفسٍ هزيله = لهم شكري وأحترامي وامتناني
ما بهم من صد عنا في سبيله = يوم جانا العلم قدام رمضاني
ومن حصل له شي يستاهل حصيله = والعرب مثل العرب مسني وساني
العرب كلٍ شرابه من صميله = مار غيب الوقت ما يضمن ضماني
يوم قربنا الزناد من الفتيله = واختلف وضع الكلام من اللساني
قام ابن نحيت كساب النفيله = واعترض بنحورهم مثل حلباني
واقفٍ بالماقف اللي يستوي له = ما قفٍ يزهاه ما هو مشبهاني
الأ مير اللي عذاريبه قليله = قام بالماجوب من قاصي وداني
يوم شفنا العلم قمنا نلتجي له = نلتجي للظل عن حر الصخاني
نلتجي للظل والدوحه ظليله = دوحةٍ ما تنتج الا الزعفراني

الشاعر / عبدالعزيز بن حمود أبالعون .... رحمه الله