ديوان الشاعر// عبدالعزيز بن حمود ابالعون

بسم الله الرحمن الرحيم


أبيات مهداه من الشاعر عبدالعزيز أبالعون رحمه الله تعالى

إلى الحفيد (مشاري) بن صالح بن عتيق بن جديع الحنيني الحربي

فز قلبي من ضميري يا مشاري = يوم شفتك فز قلبي من ضميره
فزت العبرود من بطن السواري = أشقرٍ جابه من المصنع خبيره
لوف قلبي لوف زملوق الذواري = في شفا صوحٍ تلوفه زمهريره
كنه اللي مات في وسط الخباري = يوم نش من البطا صافي غديره
لك بوسط الجوف صندوقٍ تجاري = ما يجيه الا انت وقفوله عسيره
أنت فرخ الباز ذباح الحباري = أشقرٍ عينه وسيع ومستديره
لا تخيبني وأنا ذيب الغداري = يا حفيدي يا بعد كل العشيره
كل ما جالك مع العربان طاري = أفتخر بابوك صالح يا وزيره
انتخبته ما علي من المزاري = ولا علي من الصغيره والكبيره
انتخبت الشيخ دواس المحاري = فكرةٍ عسى بها مليون خيره
على شان العود دواس الخطاري = حسبته عندي من عيال الجزيره
للصخى والجود في وجهه مواري = ما تكدر خاطره عند النحيره
على فعل الطيبه والطيب ضاري = ما يتيه اللي يجيه ويستشيره

الشاعر / عبدالعزيز بن حمود أبالعون ,,, رحمه الله