ديوان الشاعر// عبدالعزيز بن حمود ابالعون

هلا مرحبا ترحيبةٍ ما بها ممنوع = تجود النفوس ابها عن الخبث والطيبي
تحيه من الشاعر على وجهها المشروع = حيا الله ولد ماجد قليل العذاريبي
هلا بك عداد الكون والكل والمجموع = على كيس ابن عساف وكيس المعازيبي
حمولة ذوي عساف لهم بالبلاد فروع = عجمانٍ لهم تاريخ معكم وترتيبي
عجمانٍ لهم تاريخ يوم البلاد مزوع = ولهم في زمان اليوم جاه ومناصيبي
دعوك ودعونا للكرامه وجينا طوع = على شان شوفك يا حصان الأطاليبي
هلا مرحبا حييت يالنادر الشعشوع = وسيع النحر والعين جثل المخاليبي
عريب المجاني ماكره ما يجيب اتبوع = حرارٍ تسلسل من عطيب المضاريبي
حرار الجزيرة من سلايل طويل البوع = على مثلهم ما تطلع الشمس وتغيبي
مشوا بالأمانه ما تغاضوا عن الموضوع = على نهج أبو تركي سياسه وتأديبي
سلطان الجزيرة سيفها الباتع الباتوع = حكم بالسياسه والسيوف المحاديبي
حكمها عقب ما ذاق من مرها قرطوع = وصفت له عقب ما ذاق مر المشاريبي
صفت للجميع وراح عنها الكدر والجوع = على شان ثروتها يجون الأجانيبي
على شان ثروتها يجون الوفود جموع = تهاوى عليها من بعيد المناديبي
تهاوى عليها من صدى صوتها المسموع = يعيش المليك اللي وفى بالمطاليبي
على راية التوحيد والبيرق المتبوع = على كل راية يرتفع غصب ومصيبي
عليه الجلالة رمزها دايمٍ مرفوع = حماها الإله بعزته عالم الغيبي
واختامها بصلاةٍ على الهادي الشفوع = محمد رسول الله وأكرر تراحيبي
واطلبك السموحه كان جاء بالكلام هزوع = لو أنا قديم وماضياتٍ تجاريبي

حييت من قلبٍ تريح واستسر = على قدومك ذاق برد ازلالها
على قدومك صاحب الحق انتصر = واللي يبيها بدون حق اشتالها
هلا هلا عداد هتاف المطر = بعبد الإله اللي سما بأجيالها
يا مرحبا حييت يالبدر العفر = ياالليث يا لمغوار يا حلالها
حييت ياللي فيك ثلاث العبر = متوفره بأنواعها واشكالها
ياالليث يا بن الليث يا الماص الحمر = وفيك العداله وافيٍ مكيالها
بأسم قبيلة حرب حياك القدر = من يوم سرت وجيت يم ارجالها
واليوم بان الحق والخافي ظهر = وأبوك عنا كل كربه شالها
اللي عسى له وسط طوبى مسقر = ينعم بنعمتها وبرد اظلالها
عبدالعزيز اللي ولاها بالظفر = والسيف والحيلات لين احتالها
جر الجراير بالجزيرة واشتهر = سبعٍ سبع كل السباع وزالها
نجمٍ بدا نوره على وقت السحر = هبت هبوبه ثم شال خيالها
هبت هبوب النصر وابليس اندحر = ونادى مناديها بروس اتلالها
ما جت لكم بأصوات والا مؤتمر = جت بالسيوف اللي تروي اسلالها
وشلفٍ شناشيلٍ يشقن النحر = وخيلٍ تطلق بالهجوم احبالها
الخيل بالميدان تفر وتكر = حتى صفى الصافي وراح احثالها
وصفا لنا مشروبها عقب الكدر = وهي امنا وحنا عيال اعيالها
نارد مواردهم اليا جانا النذر = والرايه الخضراء نعزز جالها
وانتم على منهاج مسسها ذخر = يا فهودها يا أسودها يا أبطالها
كسيتم العريان منها واستتر = عقب العرا راحت تجر اسبالها
لبست لها ثوبٍ عقب ثوب الطفر = واستبشرت للخير عله فالها
وتمت مسيرتها على شط البحر = كلٍ يبيها مار ما ينالها
من دونها تردون ميراد الخطر = يا سترها الظافي وستر احوالها
تمت وصلى الله على سيد البشر = المصطفى عن دقها واجلالها

بسم الله الرحمن الرحيم

هذي القصيده قالها والدي رحمه الله تعالى في مدح
مرزوق الثقيل العتيبي وهي رد ثناء ويقول فيها...

أنا ليا مني رقيت التله = وشلت القلم من بين روس يهومي
أخذ على راس الطويله عله = حتى تحقق غايتي وحلومي
أدور الطاروق ثم أحتله = وأعبره في شايت القيومي
يا منيف قم هات القلم والدله = عجل تراني بالمثل مزحومي
سجل لنا في صفحة المجلة = أبيات ما فيهن علي ثلومي
ما طاب والا الشين عنا خله = حيث أن ما للوم غير اللومي
ماني وكيل أدم على خلق الله = ولا لي على سمو العباد رسومي
الناس كلٍ قالته منحله = وأنا بلشت بقالتي وهمومي
البارحه ليلي قضيته كله = وعيني حداها هاجسي عن نومي
ليا جيت أبرقد كن فيها غله = من هاجسٍ وسط الحشا مكتومي
أقوم واقعد والنجوم مطله = وكثرت عليه في سماي نجومي
مقسوم والا ما علي عظله = والأدمي ما له عن المقسومي
يا راكب اللي من مديله دله = أسبق من الصاروخ بالهجومي
عليه فني والطريق يدله = أدل من فرق القطا للثومي
جمسٍ يخم الخط ما تفطن له = عليه يا نايف ثلاث رقومي
عده لمرزوق الثقيل وقله = سلم عليه وعلمه في علومي
له سفرةٍ ما ترتفع عن زله = ما حط فيها من بنات الرومي
تلقى عليها كل يومٍ فله = يرمي عليها من فقار الكومي
قولة هلا باللي يجي طبعٍ له = لو كان ما هو بالعرب ملزومي
طيب وطيبه يوم كان جبله = هذا حسب عرفي وذا مفهومي
اللي فعوله كلبوها مجله = طير الثلاث اللي يكف الحومي
عندي وكلٍ مولعٍ في خله = والناس كلٍ له صديق وقومي
حيث أن أبو نايف قليل الزله = وافي وهذي سهمتي وسهومي
والله لا أغني بالثقيل رضاً له = وأمجد الطيب عساه يدومي
من لابةٍ يروون حد السله = يوم الملاقا ضربهم مسمومي
أولاد روق متيهين الظله = ليا جاء نهارٍ فيه وسومي
خصيمهم تطري عليه الذله = ورصاصهم في اسابقه ملحومي
أحبهم يا منيف دين ومله = خفاف النفوس قليلين الزومي
تم الكلام وكل شي بحله = هذا وصلى الله على المعصومي

الشاعر / عبدالعزيز بن حمود أبالعون رحمه الله