ديوان الشاعر / علي بن زيد الحربي

ياراعي الجمس الحمر هاك مضروف = وزنه خفيف ولابحمله كلافه
ضرف مهم بداخله عدة احروف = يحمل سلامي والتحيه مضافه
اعزم وقاك الله من كل صادوف = واجزم ولو طالت عليك المسافه
من الخرج مسراحك على بحة الشوف= والظهر في طيبه مقر الخلافه
لالك ملف دونها ولالك وقوف = اقض اللزوم وقرّر الانعطافه
ملفاك شخص للمهمات موصوف = تلقاء المحبّه مع كريم الضيافه
عطه الجواب ولك جميل ومعروف = واصبر الين الخط يفتح اغلافه
ثم قل يابو بندر ترى عندك ضيوف = عندك حتى تأذن لهم بانصرافه
اهل لزوم وراعي الشغل ملهوف = ليا احتس تكثرلفته واحترافـه
قل مرسل المرسول يشكي لك ضروف = هذا ولدك وعند ابوه المرافه
في عصر امان ولازمه طابع الخوف = لوكان مايعرف سبب للمخافه
من الهموم يجيه طوف وراطوف = والله اعلم في نهاية مطافه
ليا انجلى عاصوف يفشاه عاصوف = كسافة لوكان ماهي كسافه
هموم تجيه اشكال والوان وصنوف = نوب ينام ونوب نومه يعافه
واسمع وقاك الله من كل صادوف = احيان كذب اللي تقول الصحافه
يكتب بها عاقل وجاهل وملقوف= لكن يدان المتهم باعترافه
هذا كلامي وانت قل لي وشتشوف=وليا عرفت الحق مالي احسافه

سلام وتحيه من ضميري لــها مفعول = طعمها العسل وبريحها المسك والكادي
تحية محبه ساقها منطق معســول = تحرّك من الاعماق جود لمن جادي
على نايف الجربوع مني بكل وصول = لانه حكيم ويفهم الجيم والضادي
علومي يابو طلال بنيت على مدلول = اباارمز لها والعلم وضعه ماهو عادي
انا ليا بغيت اقول مدري وشاباقول = لكن خاطري لمنازع الهرج منقادي
اباسألك عن رجال حازم ماهو مسئول= بداء وابتدا بالحرب والاظلم البادي
وعن اللي حمل واليوم فوق الظهر محمول= وعن المستفيد اللي قضى العمرمافادي
وعن اللي مثل ماقيل يكره وهو ماكول = وعن الساكت اللي كل مايسأل ينادي
وابانشدك عن بنت وفت عقب حال الحول= لها وقفت تعجبك في عالي الوادي
وعن الابلج اللي تعتزي به وهو مشلول= وعن اللي يصيدونه وهو قبل صيادي
وعن الزارع اللي كل ماجمع المحصول = كلته الطيور وعاوده حظه الرادي
وانا لي هدف لاشك مابغى الكلام يطول = افضل يكون العلم في منطق هادي
اذا كنت مثل الذيب وصط البلاد تجول = با العلم واسبابه وانا موقفي عادي
كبير المقام اليوم تكفيه حبة فول = وهو من قبل يشره على طيب الزادي
عقب مايقود القود بذراعه المفتول = وطاه الزمان اللي وطا بعض الاجوادي
انا بانشدك وشصارمن هول لابالهول = اريد الخبر وانا على العلم ورّادي
ليا ارسلت للمرسل جواب مع المرسول = توكد ترى ما فات ماهو بينعادي
توقع ترى قدامنا عالم مجهول = تدين البري بالذنب وتميل القادي
انا عارف ان الرزق عند الولي مكفول= يسوقه ولي العرش من غير ميعادي
حياة الرجل تمضي وتفنى وهو مشغول = ورا الزود يجري لكن يموت مازادي
نبي ندرس الاوضاع ونلاعب المجدول = نصفق مع النادي ونلعب مع النادي