ديوان الشاعر// عبدالعزيز بن حمود ابالعون

يامل قلبٍ بين زعـلان ومنيـس = نوبٍ يسيح ونـوب فيـه التوايـه
نوبٍ عليه الهم ياخـذ مراويـس = ونوبٍ يريحني ويكسب رضايـه
مدري علام الحظ جتله عواكيـس = ابيـه قدامـي ويرجـع ورايـه
يا منيف قلبي فيه مثل الدبابيـس = قامـن يغزنـه بثومـة حشايـه
نومي على كوعي ولابي حواسيس = أهد وأبني مـن خـلاي بخلايـه
إلا ان قلبي فيه كثـر الهواجيـس = ذا له ثلاث سنيـن بيـح خفايـه
اما يجـن اجـداد والا مراميـس = صاراً عليه سلطـةً مـن سمايـه
هات القلم ومسطرات القراطيـس = والله عليـه المبتـدا والنهـايـه
وانا ليا هبت هبـوب النسانيـس = ليه على بـدع المثايـل هوايـه
يا راكب اللي يوم يزفر ليا ديـس = مثل الرعد صوته يهـز البنايـه
يهوي كما تهوي خلوج القرانيـس = جمسٍ على شفي وغايـة منايـه
عده لابن هجاج خـل الدنافيـس = ضعوف الرجال مضيعين الحكايه
جازي ليا كثرت على اللواليـس = انصاه ليا منـه تلولـس رشايـه
انصا ولد هجاج واخلـي الهيـس = لو كان أمبر ومن حساب اومرايه
اللي يزورونـه ولات المحابيـس = راس الشيوخ وخل عنك الدعايـه
انته ومثلك يـا بعيـد المناطيـس = دايم لعصمان الشـوارب حمايـه
وانته يابو نواف مالـك مقاييـس = فيك الحمـوه والكـرم والهدايـه
يا ريف هتاش الخلا بالغطاليـس = انته مثل هـداج مابـك روايـه
هداج تيماء اللي وروده كراديـس = ما طبه الغـراف ياخـذ وقايـه
تمت وانا ماني مـدور لحاويـس = ولا شلت من بين الجماعه عصايه
شري على العدوان ماهي تلاميس = ولا علـى ربعـي بعيـدً مدايـه
من دونهم حولت وسط المتاريس = لين اشتكوا مني جميع اخصمايـه
انا وربعـي كاسبيـن النواميـس = مني ثنا البيضاء لكـل اعضدايـه
يوم الصياح ويوم حذف المقابيس = عدوهـم دقــوه دق الوقـايـه

الشاعر / عبــــدالعزيز حمود أبالعون رحمه الله

عديت روس النايفات المشاريف = في ساعةٍ فيها الخلايق مصده
أخذ على نفسي وأعيد السواليف = واليا بنيت البيت أرجع وأهده
أخذت من وقتي براسه تخاطيف = وحولت منزاعٍ على البال شده
هيضت ما بالنفس بالشعر تؤليف = بأبيات من شعري وهذا مشده
سر يا قلم واكتب عن الحال تعريف = واللي تكنه داخل القلب عده
من هاجسٍ بين الضلوع المهاديف = وسط الحشا كم له من الوقت مده
يسوقني داع الوفاء بالمواقيف = رد الثناء غايت ضميري ووده
يا أمير يا راع الوفاء والمعاريف = اللي لكم يا أمير صعبٍ نرده
والله لاكتب بالقصايد تواصيف = عن طيب تركي دون خاله وجده
من دون طيب الخال غيث الملاهيف = جده بوقفات المراجل يسده
ظلٍ لنا عن واهج النار والصيف = لا قال قولٍ يشبه السيف حده
تركي بجاد ومثل ابو عقاب ما شيف = عز الصديق وكل عايل يصده
ابو عقاب ان عودت للتصانيف = ما وصفوا بالطيب مثله وقده
تركي على كسب الجميلات حريف = دايم على الطولات هذا مكده
يفرح ليا منه لفا مجلسه ضيف = طلق الحجاج ولا يمدون مده
ملاذ من همه يبي عنه تخفيف = من جاه يشكي قال لا زمك بده
هو شيخنا لا صار ميله وتحريف = أمير حرب وكل حاجز يهده
من غير تركي وا عنا القلب يا منيف = يا حي يا قيوم عمره تمده
وتحفظ جنابه عن جميع الصوادبف = وعن كل مكروهٍ إلهي ترده
في جاه من بأمره تهب العواصيف = الواحد اللي عالم أحوال غده
تمت وأنا مالي وراها مصاريف = ولا أقولها من شان هاته ووده

الشاعر / عبدالعزيز بن حمود أبالعون رحمه الله

قم يا نديبي فوق تسع وثمانين = توه على التمرين والاشتغالي
عده لبو ماجد وهو بالتمارين = نبا نزور زيارةٍ با حتمالي
نبا نزورك يا زعيم المضايين = وزعيمنا عند اكتراب الحبالي
ونرثاك وانته حي يا كامل الزين = فيك الثلاث الكاملات الجزالي
فيك الكرم والخلق والثالث الدين = ثلاث ما فيهن شكوك وجدالي
سلطان ربعك يابو ماجد سلاطين = أخوان جوزاء ميتمين العيالي
تاريخهم مفهوم ما هم خفيين = السربه اللي يحتمون التوالي
مار انت مثل اسهيل بالعقل والعين = وانا ترى عرفي على قد حالي
يا كامل الاوصاف مالك مثامين = جعلك تعيش اسنين جرد وليالي
انت مثل هداج يوم المقاطين = علبه مثل الغيم ناس وحلالي
وعليه قطعان ترك المعاطين = ليا روحن مثل طخاف الخيالي
هداح تيماء اللي تجي له براهين = بالوصف مثلك يا كريم السبالي
يا ويلنا عقبك من الهم والبين = ومصافق الجيلان شرق وشمالي
ياللي وصوفك بالجماعه قليلين = الا حجر استثنيه وسعود خالي
سعود بن مطلق عن الجيم والسين = أضن من معناي واضح سوالي
بالوصف لو حطيتكم بالموازين = تساوت الكفه على كل حالي
ورباح شمعتنا بوسط الدواوين = عز الله انه من خيار الرجالي
جعله على عزه وحنا عزيزين = في جاه خالقنا عزيز الجلالي
وسعود والديري وناسٍ مسمين = ودي بهم لاشك ضيق مجالي
سعود اخو صيته زعيم الموالين = ربعي ليا ركب الرشا بالمحالي
اللي ليا وصفت مثل ابو حدين = يفعل نهار الكون عرض وعدالي
سيفٍ ليا جرد يقص الشرايين = من لامسه فارق براد الظلالي
الشيخ ابو راكان شرع وقوانين = ليا قلت الحيلات والاحتيالي
وموسى ولد خالي زعيم الفراعين = ليا جيت يمه بالزوم ارتكالي
ما صد عني يوم جيته لثنتين = ولا قال دور يالبناخي بدالي
الله عطاه العرف والعقل واللين = وفهمٍ على بعض المخاليق عالي
انصاه لامنه غدا الراي رايين = وضاقت عليك من الهموم السهالي
انصا مثل موسى وخل ابو وجهين = وحجاب شيال الحمول الثقالي
اللي ليا نوكب يفك المساجين = وياخذ على غيره وسام ومدالي
شفنا وعرفنا يوم دعوا المراوين = يوم ان الأقصى يدرق بالموالي
وقفوا على وضح النقا مستعدين = حتى انتهى الموضوع وارتاح بالي
السبعه اللي كلبوهم وفيين = شفنا وفاهم شوف ما هو خيالي
شيوخنا اللي بالمواجب لازين = قاموا بواجبهم كمال وجمالي
لهم ثنا البيضاء من اول وهالحين = يرفع لهم بمشمرخات الجبالي
ربعي بني سالم كعام المعادين = دفانة الركبة نهار القتالي
ان اجلسوا وان كان قاموا ثقيلين = بالوصف مثل مخزمات الجبالي
ميزانهم ثقيل ماهم خفيفين = مثل الجنيه اللي رجح بالريالي
ما مثلهم يوم اعتراك الميادين = عندي وكلٍ له مع الناس غالي

الشاعر /عــــــــبدالعــزيز حمود أبالــــــعون رحمه الله