ديوان الشاعر/لافي بن نفجان الحربي

ياموتري طال صبري وانبحث سدي=والناس بالهرج والغيبات مكلوفـه
ثلاثة اعوام بين الجـزر والمـدي=لين اصبحت نية النمام مكشوفـه
حسيت خمني اببعض القوم متردي=ياموتري سج لديـار بهـا نوفـه
تراي ضايق من الديره ومتحـدي=والنفس فيها زعل والكبد ملهوفـه
اصبر على حاجتي لاتنحرف ضدي=مابه سنافي بطيب ومنّ معروفـه
لو انت رجال ناديتك ذخـر جـدي=حيث الملامه بعيد ٍ عنك محذوفـه
ابيك ترفع بعزمـك ليـن ينشـدي=خل البساتم تكيـل النـار لبلوفـه
لاتنخدع لو رفعت الرجل لا تهـدي=لو ازدحم خط عرعر عندك كتوفه
على يسارك سواد البيب ممتـدي=وعلى يمينك جنود الحد مصفوفـه
قور الضويحي لها ثنتين متعـدي=حاسب لدربك بعد خمسين لاتطوفه
وأسلك طريق ٍ ليا دليتـه يـودي=يرهب ردي العزايم بعده وخوفـه
على مغيب النجوم الست متقـدي=الله يجيرك من العاثور وصدوفـه
الليل طرف وانـا ياموتـري ودي=مصباح دار ٍ بها تل نبـي شوفـه
يأنس لها ناقل القرنـاس ويهـدي=عنها هقاوي هل التفحيط مصروفه
ماياصله كود مثلك فوقه مجـدي=طرقه تعيبه بسحب الخوف محفوفه
اوجزت بالشرح ماني فيه متمـدي=الدور دوار محد ٍ يامـن ظروفـه
خوفي من الله يوقفني على حـدي=ماقول قول ٍ تقفاني بـه ضعوفـه