ديوان الشاعر/لافي بن نفجان الحربي

سمعت هرج مروج الهرج يا سعـود=والنفس لبعض القول ما هي صبوره
أمسيت من قول أهل الهوج ملهـود=والعوج تمرض لو أهلهـا محقـوره
يلومنا بالجـود يـا منقـع الجـود=اللي بالاريـاء والعقـول مخشـوره
يالايمي ماجيـت مـع درب منقـود=وأخبرك ماني من رجاجيـل بـوره
عنّا المرمه دربهـا حيـل مسـدود=واللـوم عنـا قاصـراتٍ إشبـوره
با للازمه دنياي مـا تـأزن العـود=أبيعهـا وأهـل المـلام مخصـوره
ماأسمع لشور اللـي عـن الجـود=مردودرائي براسي والجنون محشوره
اللي ضراء للبيض ما يقبـل السـود=والحق واضح والـدروب مخبـوره
للنقص ما نقبل بعـد قمـت الـزود=ولاني بحال اللـي تـردت إشبـوره
لياء أنّسدح عن واجبه كل سمهـود=النفس للواجـب جـزوع وغيـوره
وأشفق علي العليا ولودربها صعـود=واللي يشور بهون ما اطيع شـوره
ولياء أعرضت ما أصد والرب معبود=ربٍ جعـل بيتـه لخلقـه تــزوره
متكفـلٍ بالـرزق والعمـر محـدود=حيٍ رزق حجـرف ودابـه بغـوره
وترى الجماله دونها الدرب به كـود=تصعب علي عفن الرجـال بعبـوره
وأنا أفهم اللي يفعل الطيب محسـود=يلومه اللي ما شعـر فـي قصـوره
يعطي عن الواجب لياء جا له إصدود=ووقت السعـه للطيـب يـدق زوره
عند اللوازم كن ما هـوب ماجـود=وعن مجلسه تلقى الدلال مهجـوره
وأن أرتكـى للسافـه يخلـق بنـود=سلطان مجلـس واليميـن معثـوره
يقلد الذكـري سعيّـد وصـا هـود=ولا بن ناحـل فـي زمانـه ودوره
لكان ما يحـدث بلاشـك مشهـود=لابد يطلع له مـع النـاس صـوره
ولاينفـع المعـذار والامرمقصـود=وبعض البشر عن اللـزوم معـذوره
يا لي رصدت الناس تراك مرصـود=وكلن عرفنا من إلسانـه إشعـوره
لاتحسب إنك سيـدٍ وأنـت مسيـود=الناس ماهـي لوحكيـت مغـروره
لاشك ذ ولاء الخلق من دور ثمـود=ويذكرلنـا عنتـر تـورط بـثـوره
وتم الكلام وكـل شـيٍ لـه حـدود=والحـر الاصلـي مايغيـر وكـوره
وصلوا علي المختا رما ذعذع النود=اللي مشـاء بالديـن وأنـار نـوره