ديوان الشاعر هواش بن عايد بن زبن السليمي الحربي

غنيت في قاف معانيه وافيه=وكلٍ حسب عرفه يغني مثايله
وانا اليا غنيت ونّست خاطري = اترك ضعيف القول وابدي باصايله
واسباب ما هيض غرامي وما جرى = اشوف حيٍ جدد الله سمايله
شفت الضباع هيام والرزق ماشي = والذيب يركض والعشا في غلايله
رزق الضباع يزورها وسط غارها = والذيب عن شفه تكسر مكايله
يقطعك دنيا ضيمها من نظامها = عدله نهار وعشرة ايام مايله
قالو لنا العرّاف لا تامنونها = ترى نهار العيد تجلب بدايله
مثل الظلال رجالها ياصفونها = إن زلت وإلا عنك بالظل زايله
شالت بشر بعد النذر يتبع النذر = وهذا على غفله تنوّخ رحايله
يطلع من الدنيا على الغيض والرضا = ويصير في بيت جداره صقايله
يغمّقون البيت له من كرامته = وعليه صدقانه تهايل نثايله
واقفوا عنه وقيف فوقه نصايبه = ويلقى ما قدم من خطاه وفضايله
وان فات كل الفوت ماينفع الندم =تلهث ورى علمٍ تعدّتك اوايله
يارب عبدٍ جامع الخوف والرجا = عفوك نهار العبد باريه سايله
يالله عفوك يوم تشهد جوارحي = يوم الحساب اللي عظيمه هوايله
يارب يومٍ فيه الابصار شاخصه = انا دخيلك عن خزاه وخجايله
وخلاف هذا جزت من رفقة البشر= أدنى الملا ولاّ من اطيب قبايله
اخاف من رفقة كريمٍ من الملا = ان زدت ..زاد وراس ماله نفايله
ولاني مرافق معدن الهون والردى= اخاف هذا يلحقنّي فشايله
ولاني مرافق من يجود بماله =كل الدهر وانا رهانت جمايله
لو قلت اثمّن كل جوده بمثلها =الرد عندي ماتوفر وسايله
لو احتزم و اواصل السير بالسرا = قدمي جبل طايل على كل طايله
راع الظفا الظافي على اللين والقسا = وابوه قبله كمل الله خصايله
وخاله وخال الخال يضرب به المثل= بالجود وان جت خيل الاضداد صايله
من روس قومٍ تدّب الخيل بالقنا = ورفيقهم حبله يديهم وصايله
حنا رجاجيل الدرك نعتزيبها =وحي الدرك ما باقي الا قلايله
رفيقي اللي عزوتي يعتزيبها = لقن حديثٍ زايفاتٍ دلايله
يجلب حجر طارق عليّه من الخطا = جابه باجاره من هكالدار شايله
حجر جبل طارق يرده لطارق = والعلم جاهم من عمامي صمايله
العلم الاول يدفع الغيظ بالرضا = والعلم الآخر مردفاتٍ ثقايله
قومٍ ما تبني دارها من حجارها = ترى الحجر دايم تخلّه دخايله
وطير البحر وان طالع الظل بالبحر =يظنّها ورقى عن الدرب عايله
يظن ظله طير وارهى على العشا = وحوّل على ظله مع الما يخايله
واليا نزل وسط البحر شاله البحر =غاص البحر والموت جاته رسايله
ياما نهيته مار عيّا يطيعني = وبعد الرهى بالراي يبست بلايله
حنا بني سالم من الشام لليمن = من زلّ ما تمشي علينا هزايله
نعطي طويل الباع رمح المطنّي = ان قرّب القداح واشعل فتايله
مال المشيقح كان ماجاز وانتهى = يمكن يسبب له معاصير قايله
هذا وصلى الله على سيد البشر = عداد ما هل المطر من مخايله