ديوان الشاعر الكبير / مرزوق بن مبشر الحثل المزيني

السلام عليكم ورحمة الله وبركاته

البارحة ياهـلال ماتقـل مـع نـاس=هايم بجـوٍ فيـه كنـي لحالـي
أخذت لي مع شَردة الفكـر مـرواس=اشري وابيـع ويقظتـي راس مالـي
مابين جزر ومد واخمـاس واسـداس=بالمقبـلات وذكـريـات الخـوالـي
عندي احساس وشفت برهان الاحساس=واحترت بين وبين. واشغلـت بالـي
حبل الرجا مالم لـي حزمـة اليـاس=واجابتـي منـي عـلـي بسـوالـي
السانتي قيـاس . والـوزن قسطـاس=وعلم الفلـك يطـول فيـه الجدالـي
والقوس جذرحساب واتفـك الاقـواس=ويقسم على أس اثنين واطي وعالـي
وإذا احترق سلك الظفيرة والاجـراس=وصار المجادل بالفصيـح ارتجالـي
وصل خطاب دباس من والـد دبـاس=خطـاب غالـي مرسلـه يـم غالـي
وقرا الخطاب دماس اختار عرمـاس=وعلى الثقـال دبـاس شـد الرحالـي
النـار مبداهـا شـرارة ومقـبـاس=والطيب سندى والقسـا لـه رجالـي
الطيـب مادونـه مراكـز وحـراس=والعـزم سلـم مدركيـن المعـالـي
وكثر التمني بارجـل مبـدا الافـلاس=والهـون هـودج ممتطيـن الهزالـي
وبعد النظر توفيق والصبـر نبـراس=وصعب الحمـول لنايبـات الجمالـي
والقبض ما يقارن بوضـع التلمـاس=ومـن مالـه اول مايطالـب بتـالـي
مبدا خبر من راس شاف وفقـد راس=وش للضمير المستتـر مـن مجالـي
ياشين نيبان الدهر تضرس اضـراس=والصايـح النايـم هـدف لايـزالـي
سود الحروف بلوح ماهي بقرطـاس=جملة نـدى تحمـل عتـب وابتهالـي
لمشغل الـرادو علـى دوري الكـاس=في حنـدسِ كاسـي سمـاه الخيالـي
بـوسِ بعـز ولارغيـد ِ بتـنـداس=والـرزق عنـد المنفـرد بالجلالـي
نبرة شجن لكليـب وايـل وجسـاس=قمـر ثمـان وسـت ماهـو هلالـي
تيار نـار المحرقـه صـار نسنـاس=والمر صـار بدورنـا اليـوم حالـي
رخص الثمين وداسه ابنـاه وانـداس=الناقصـيـن المدعـيـن الكمـالـي
اللوم لـه منصـى وماقـف وجـلاس=علـى مواريـث الفعـول الجزالـي
الوارديـن لمصـدر البـق والحـاس=نزول مـن عالـي لجـرفٍ هيالـي
حط بصناديق الذهب خـردة نحـاس=وامر واهـى قيـل الاهـوج مثالـي
إن قلت لـه زراق وان قلـت نـداس=وإن قلت باشق كلهـا لـه خصالـي
حطاب ليل حامـل الحبـل والفـاس=ما راقـب السبـع وقطـب الشمالـي
يالله يامحصـي عالمـنـا بـكـراس=يامـن عليـه حمايـتـي وتكـالـي
تلطف بكبـدٍ كنهـا وسـط محمـاس=وقلب ٍ صلاه مـن المقاديـر صالـي
رافقني الهوجاس من سقـم الاوجـاس=على عضيـدي واصدقـاي بنضالـي
فقدت رمح وسيف والـدرع والطـاس=طلبيـن الاريـا مكرميـن السبالـي
موارد ٍ فيها الروى ماهـي إرسـاس=ياكبـر فرجتهـم ونـا وش بقـالـي
إلا بطاريـهـم شفـايـاي يـبـاس=اروي سوالفهـم ووصــي عيـالـي
مع مثلهـم رفقـة جزالـه ونومـاس=وانصح عن اللـي رفقـة بالظلالـي
ماكـل قرنـاس يعـوض بقـرنـاس=ثلثيـن رفقـان الصـداقـه تسـالـي
اللي على هيئـة عصافيـر وبسـاس=لاتقول ابن عمـي وذاك ابـن خالـي
لاتجامل اهل المنخفـض والتدسـاس=تـرى الحـرار اوكارهـا بالطوالـي
زئير ليث ولاطرب جخـدب السـاس=اهل الرجـاح اجبـال نبـع الزلالـي
بتجاربي بمختلـف بعـض الاجنـاس=عبرت . وتعبيري علـى قـد حالـي
عانيـت واعـانـي جــداد ودراس=وسود الليالي خلـف بيـض الليالـي

الشاعر الكبير/ مرزوق بن مبشر الحثل المزيني الحربي