ديوان الشاعر \ نافع الحربي

هلاهلا ماخط حبرٍ بقرطاس

هلاهلا ماخط حبرٍ بقرطاس = ومارف براّق الحيا في سحابه
بشعرٍ يسامرني على هجعة الناس = سلم وسلمني مفاتيح بابه
دق الضمير بمرهفاتٍ من الماس = يكتب على نبض المشاعر جوابه
ويلي على خلٍ خليلٍ على ساس = صاف الضمير اللي عزيزٍ جنابه
اقطع به الفرجة على كل نوماس = ليا من ردي العزم كشّر بنابه
ليا طال سجن اللي ورى سور الاقواس = وصار الفظا عندي دهاليز غابة
وقامت هواجيس الحشا تضرس أضراس = أضراس المحاور في محال اللهابة
دنّيت امعسوفٍ عليه الزمن داس = منقوش في صفحة جبينه عذابه
طقّيت فوقه لطمتي يمرس أمراس = أصم وأبكم ما نطق لي بجابة
يهوي أهواي مسندس الريش قرناس = حتى سواد الليل ولّت ركابه
والصبح أشم الورد مع كل نسناس = مع درب غيثٍ شق برقه ربابه
شيخٍ أتعزف له مزامير الاجراس = عليه من تاج الوقار المهابة
الذيب له وقفة ورمعة ومرماس = كم مرقبٍ صلف الذواري عوابه
له ماردٍ ما ياصله كل عساس = نبعٍ على ملسٍ عذيٍّ شرابه
والحر له في عالي الجو مجلاس = براس الطويل المعتلي من هضابه
بطراف قفرٍ خاليٍ ما به أوناس = يرفع منيفات الرواسي سرابه
كم من جريحٍ دم قلبه على الساس = يدفن بغابات الظماير صوابه
يضحك لو إن الحال يرعى بها اليأس = على الأمل وليأس تقطر حرابه
يخاف نمّامٍ مع الناس بلاّس = يرقب عيوبه راقب الله عيابه
كم مطلبٍ دونه بعيدات الارماس = يقتل مريض القلب في سم دابه
زودٍ مداه النقص يرجع للإفلاس = وقصرٍ بلا سكان يرجع خرابة
وحيٍّ وراه الموت قطاّع الأنفاس = أيحصد مشيبه ما زرع في شبابه

نافع الحربي