ديوان الشاعر الكبير: عضيب بن هليل العلوي الحربي

أمسابقات الشعر ماهي صريحه

يابدر هاضت بالبيوت القريحه=بين الزعل والغلب والعاطفيه
انا بوجه لزملائه نصيحه =تقدير للشعار مني هديه
تقدير مني للوجيه الفليحه=اهل المواقف والفعول النقيه
اللي بهم من نية الخير ليحه=انا عرضت الراي من حسن نيه
والناس كلٍ له مزاج وشريحه =وانا كلامي للوجيه النديه
أمسابقات الشعر ماهي صريحه=فيها على ماقيل ظلم وخطيه
فيها النتائج ماتهيا صحيحه=ألا عليك من المعزب وصيه
هذي علامة ظلم وايضاً فضيحه=ياللي تبا الحسنه تحملت سيه
كم جابةٍ منها المشاعر جريحه=لاميل الميزان خطو الدهيه
اشوف ماكل السوالف صحيحه=لاشك من ينظر لنا بالقضيه
كلٍ جواده للمكاسب مشيحه=مسكين ياراع الجواد الرديه
شافو ا على المضياح باللوح ضيحه=كلٍ يقول ارجي عسى الفود ليه
تغانموها مدورين المديحه=والعلم واضح والشعوب الضحيه
من طاح بالميدان قالو ا مطيحه=على نصيب الذمه العامريه
ليت العرب من وضعها مستريحه=مافيه داعي نبعث الجاهليه
الناس ماهي باللوازم شحيحه=هذي تحث الناس للعنصريه
نوبٍ طلبهم للبيوت الفصيحه=ونوب الحدا واللهجه السامريه
ماب الصميل يبينه من نضيحه=بالخطه اللي مالها قابليه
أليا تحداك الجبل من نطيحه=عند النهايه وين راع الرعيه

الشاعر الكبير / عضيب هليل بن شلاح العلوي الحربي

السلام عليكم ورحمة الله وبركاته
((((0طيب المكارم حايزه))))
هذه الأبيات إهداء من الشاعر/ عضيب هليل الحربي، إلى الأخ العزيز/ معتاد محمد الغيداني الحربي:

سميت بالرحمن وأخزيت اللعيـن=واخترت من جزل الرموز العايزه
أنا ليا جبت المثل جبـت الثميـن=أخذ جزيل القاف وأترك بايـزه
يا أبو محمد يا عشيـر الغانميـن=يمناك دايـم بالمراجـل فايـزه
عندي شهاده والجماعه خابريـن=باللحظه الأولى خذيـت الجايـزه
أنته قطعت الشك بالعلـم اليقيـن=ما هي سوالف مسـردٍ متشايـزه
طلعت يا معتاد بالعلـم السميـن=وينبيك عن فعل الرجل خزايـزه
طبايع الإنسان تكتـب بالجبيـن=وعند المواقف تتضـح غرايـزه
طلعت مع روس الرجال الطيبين=ربعٍ على طيب المكـارم حايـزه
بعض الرجال ليا حكى للسامعين=الله أكبـر يـا كثـر جنـايـزه
يذبح كثير الناس في حد السنيـن=لو كان ما يسوى حدى عجايـزه
همرجـيٍ مـا تقضبـه اليديـن=مع كل طارش ياصلن كزايـزه
ليا رجعنا للعدد ما صـار شيـن=والبيت بنيانـه علـى ركايـزه
وفيهم سنافـيٍ يسـر الناظريـن=ما فيه شيـئٍ بالرجولـه عايـزه
الكامل الله من حسـاب الكامليـن=مثل الذهب ما تختلـف كنايـزه
أسمع فداك اللي عن الواجب مهين=ما غير نفسه يا الحبيب تكايـزه

الشاعر الكبير/ عضيب هليل بن شلاح العلوي الحربي

السلام عليكم ورحمة الله وبركاته
لقد تشرف الشاعر عضيب بن هليل بالاشادة بمكرمة المكافأة على جميل العفو، وسماحة الخلق التي تجلت في تنازل عنبر الرويشد عن قاتل ابنه، من قبل الشيخ محمد الفرم، حيث يقول الشاعر عضيب:
ضرب عنبر الرويشد أروع الأمثلة، عند ما تنازل عن قاتل ابنه لوجه الله تعالى دون جاه أو وجاه أو وساطة أو أي مقابلٍ من مالٍ أو غيره، وفور سماع الشيخ/ محمد بن عبد المحسن الفرم، شيخ بني علي، من قبيلة حرب، خبر تنازل عنبر أثر أبو فيصل أن يزوره في منزله بحفر الباطن، ليقدم له العزاء كما قدم له سيارته الخاصة، هديةً له، وتعبيراً وتثميناً لموقفه النبيل، ليضرب أبو فيصل بذلك أروع الأمثلة في المكافأة على سماحة الخلق، والوفاء لأهل الوفاء، وقد أعجبني ذلك من الشيخ محمد الفرم، ورأيت أن من واجبي أن أشيد بطيب خصاله، والوفاء الذي لا يستغرب من أبي فيصل، ولكنه عمل طيب يستحق الإشادة، ولأن مثل هذا الفعل الطيب جديرً بأن يجسّده الشعر والتاريخ، ليكون أسوةٍ تحتذى، فإلى الشيخ محمد بن عبد المحسن الفرم، أهدي هذه الأبيات:

سلام يا حـرٍ فعايلـك شاهـدك=معروف ما تحتاج مني شهـاده
الأوله عندك وهـاذي عوايـدك=تشفق على كسب الأوايل زياده
أخذتها غصبٍ على خشم حاسدك=أخذ الأوايل لك طبيعـه وعـاده
يشهد على ما أقول ما تبذله يدك=ولا خير في هرجٍ بليـا وكـاده
وأقبل تحية من يعـزك وييـدك=عساك دايم بالبقـاء والسعـاده

الشاعر الكبير/ عضيب هليل بن شلاح العلوي الحربي