ديوان الشاعر خالد الحصني

يا مير تنشدني عن اخر جديدي = هذا جديدي وافتخر فيه يا مير
يا صار في ربعي نوادر قصيدي = من قدح راسي مارجيت الشواعير
تحت عصاي الشرد مثل العبيدي = شردٍ من اهجوس المطفق مذاعير
من منهل با الجوف شيبه وريدي = يلف عليه مثل ملفى المسايير
طر ايف في ذكر عهد مجيدي = للمستمع مثل الدلا ل المباهير
افخر وماري با الفخر في نشيدي = واشوش شووشة من لفلوه الخطا طير
شوشات ابن ناحل لركب منيدي = والا عويض با اليال المعاسير
اشوش شوشتهم وطولي يزيدي = اليا ذكرت افعول ربع مغاوير
ربع لهم با المجد عهد تليدي = يوم الطراد ويوم نقل البواتير
وقت قبايل نجد بدو شديدي = مشهاتهم ما تهتويه المعاشير
ما يجهل الحصنان غير البليدي = او موجس نقص بنفسه وتقصير
حربة قبيلة حرب قدم الضديدي = اليا ختلط عج الدخن با المعاصير
على ظهور الي حذاهن حديدي = يردون حوض الموت دون المصاغير
يا قال صياح الفزع يا عضيدي = عنها حدونا وفزعوا يا مظافير
ثم انتخا للعلم راس عنيدي = زبن الدخيل معشي السبع والطير
ما كنه الا خالد بن الوليدي = وبا الجاهليه غطرسة سالم الزير
عنده نهار مطارد الخيل عيدي = ومن السطر من دوره قالوا مغير
الي على ناره عددهم عديدي = الي من الحصنان والي من الغير
من كثر ما جاب الجهم من بعيدي = امعانقينه روس قوم ومشاهير
ومن صيحة الفزاع صاح العقيدي = يا هل غصيبه ما تفيد المعاذير
عن حرب والله ما نشط ونحيدي = الراي يا اهل الراي شيروا وبا اشير
تحيزموا والراي له من يجيدي = مبحل وهو مبحل يحير ولا يحير
امحنك رايه با الريا سديدي = يا عمسة الاريا يدل المعابير
ثم نقطع صلب الكلام المفيدي = والخيل دقة في حذاها المسامير
وردو حياض الموت خطلان الايدي = مثل العجاجه في جموع الطوابير
دار النهار وجا نهار الوعيدي = وطاحت عزوم الي تقافوا مدابير
نهار كان الحرب يوم سعيدي = يوم تورخ فيه نجد التعابير
رد البرى منور ابفعل فريدي = بامدوح تقاطعوه المناعير
قبل يسود بنجد حكم حميدي = وقبل يصيرون الشيوخ الهوامير
قبل يصير الشيخ حسب الرصيدي = والمشيخه تعطا لراع الدنانير
وقت مضى ما قول جعله يعيدي =وقت الجهل ومسطرين الاساطير
لو تنشد العاقل من المستفيدي =ما قال ودي ما حصل يرجع يصير
الله يبدي با العباد ويعيدي = وله حكمة في ما يشا من تدابير
نريد والله يفعل الي يريدي = ولا عندنا علم بغيب المقادير
هذا وانا منقص حقوق العبيدي = كل عطاه الله من الشر والخير
هذا جديدي فيه افاخر واشيدي = صورة شي كان با القاف تصوير