ديوان قصائد الشاعر(بخيتان البشري)

يا هموم الوقت

ياهموم الوقت جودي وابعدي والعمر مره =مايكفي من شبابي لين صار الرأس شايب
شاب رأسي ياهموم الوقت وإنتي مستمره=ارجعي يكفيك ماخذتي من سنيني غصايب
الشباب اللي عرفته ما لفاني غير مُره=كل ماجاني حلاه القاه في داخلك ذايب
إن ضحكنا ماسلينا وإن بكينا زود حره =وإن شكينا مالقينا غير مكثرت الطلايب
البلا فالأدمي لا شاف شي ما يسره=سكتته فيها العجب والنطق يظهر له عجايب
الحياة الوان والأيام للأنسان عمره=إن لقى فيها سعادة وإن لقى هم وغلايب
والحياة حظوظ والأنسان حظه كم غره=وكم واحد قام حظه واعتلى رؤس الرقايب
وكم واحد في حياته اختلط خيره وشره=وكم واحد كف شره حاسب حساب اللهايب
مشكلة في حظي اللي منسدح يا كيف اجره=وأعرف إنه مايجمل فاللوازم دوم غايب
لو نصح ماكان هم الوقت فيّ مربوط سره=بس ذا مكتوب والمكتوب ماعنه جنايب
نظرتي مالحق مدها والقدر واجب نقره=والله إني للوازم للخطر ماني بهايب

الحب نكهة

الحـب نكهـة والمحبـة زهـابـه=والصدق مضمونه والأخلاص عنوان
الشوق دربـه والأحاسيـس بابـه=والود نبعه ما ظمأ منـه عشقـان
والعيـن نظـرة دورهـا ينحكابـه=والقلـب داره لا تـوارى للأعيـان
فيه التفاهـم والفهـم بـه تشابـه=والطيب للغاليـن مفتـوح بستـان
حتى الغلا يرقى مـع اللـي غلابـه=ويلامسه كوكب اراضيـه وجـدان
لين يتعانق فـي سماهـم سحابـه=ولا عاد تلقى فالمحبيـن عطشـان
عِشـره بنوهـا بأحتـرام ومهابـه=مكنونهـا إنسـان يبديـه لأنسـان
لو الزمـن لحظـة تغيـر شرابـه=يبقون في بهجة ولا فيـه زعـلان
هذا سـؤال اللـي يـدور جوابـه=هذي إجابة كـل سائـل وحيـران