ديوان الشاعر الكبير: عضيب بن هليل العلوي الحربي

سيّر عليه

ياليت محمد يوم وصلت وصاتـي=قـدر تحياتـي وسـيـر علـيـه
اخوً عزيز وعارف عـن صفاتـي=الشـك زايـل والقلـوب ابرحيـه
وانا على مثله تجًـوز اشرهاتـي=يجعـل مواثيـق الصداقيـه قويـه
اعمـارنـا لابدهـن فـانيـاتـي=ولا دايـمٍ يـاكـود رب البـريـه
قضيت لـي ساعـات بتحرياتـي=وانا احتري موترك يطلـع عليـه
من عرض ربع شوفهم هو شفاتـي=في ساعةً من عنـد ربـي فضيـه
افرح ليا صاروا النشاما حضاتـي=والنـار فيهـا للنشـامـا شـويـه
مـع دلتيـن أصغـار ومهيلاتـي=والعـود دار بـدورة الشاذلـيـه
ودارت سوالفهم على المكرماتـي=الكـل منهـم قـام يسـأل خويـه
هـذي طـراة الـروح وتمنياتـي=عندي مثل عيـد السنـه بالضحيـه
هذا هـواي ورغبتـي واشهواتـي=والناس كـلً لـه طريـق ونحيـه
احـدً هبابـه بيـن فقـر وغناتـي=لو هو كثير المـال نفسـه شقيـه
واحد هبابـه مكسـب الطايلاتـي=لو هو قليـل المـال نفسـه غنيـه
والـرزق عنـد مكـون الكايناتـي=رب بعـث للنـاس سنـة نبـيـه
وفرض على المسلم صيام وصلاتي=وارسل شفيع الخلق باشرف وصيه
الي قسم لي سامك العـرش ياتـي=لو حـاول الحسـاد يمنـع مجيـه
ربً كفل رزقـي وحـدد حياتـي=موحي دبيب النمل بالخرمسيه
رازق طيـور بالسمـاء حايماتـي=عـلام مـا بالبيـنـه والخفـيـه
ارجيه يمحـي سيتـي باحسناتـي=في ساعة الميعـاد يرضـي عليـه
وصلاة ربي عد ما اخضر نباتـي=على النبي بازكـاء سـلام وتحيـه

الشاعر الكبير/عضيب هليل بن شلاح العلوي الحربي