ديوان الشاكر ابو سامي / قسم القصائد

سلام تسليم عد النخل عذق وتامر =
واعداد ماخطت الاقلام واتناولت بوك =
واعداد سيل مزيف ولا تصدا مجوله =
واعداد سيل مزبف ولا تصدا مجوله =
يامرحبا يامحمد وانت تنهى وتامر =
جسمي معك والعقل في الشام والشرق وتبوك =
وجيوشنا وجهت واخصام صدام جوله =
وجيوشنا وجهت واخصام صدام جوله =

البارحه يوم اظلم الليل حولي = دارت بي الافكار وازريت لابات
ليل سرابي بين عرض وطولي = وتفجرت في القلب علوم مهمات
وانا في دار الامن واشوف زولي = ماهو على خبري وجريت ونات
وجات الخواطر مثل خطار جولي = من كل صوب وتالي الليل مافات
افكاري الحره سوات الذلولي = تتبع هواجيسي لها كل حزات
علوم دارت لي سوات الثعولي = قادت من مزون سديده مطلات
طبع الزمان الشين دايم يهولي = يرميك في بحور عميقه مطمات
ان كان بعدي عن وجودي يحولي = لاخير في بعد معه عشر حسرات
والبعد نار بين ذولا وذولي = والصبر مثل المر في كل الاوقات
تحسبني العربان د ايم زعولي = وانا مثل صم الجبال المنيفات
وانا اعرف الجهال واهل العقولي = واحسب حساب الهينه والصعيبات
واعفي عن اهل الجهل ان عارضولي = ماني مع الايام تباع نمات
واهل المعزه جعلها ماتزولي = صفوة مطاليق الرجاجيل وقفات
ولعلوم بعض الناس ماني فضولي = ولاني مع اهل العرف صياد زلات
اسند على الشاكر جزيل الفعولي = راع الضمير الحي بالصدق ما مات
واسند على اهل المعرفه والعقولي = حلالة العقده ليا جات نشبات
دقيت بيبان الشرف والاصولي = ولاني مدور من وراها خفيات
وانا لحافي ماقصر عن رجولي = في وقتنا اللي له علينا علامات
واختاها صلوا على افضل رسولي = سيد البشر عليه افضل صلاوات
بديت باسم الله ولاني عجولي = ومن طبعه العجله جناها ندامات
واحسب للمخراج قبل الدخولي = ومن لايحسب حسابها ذاق ويلات
واحسب للمظهار قبل النزولي = واقيس قبل الغطس في كل مجهات .
وقدام لاتاقع بوسط الحثولي = احسب لها قدام لجات الاصوات
ولاني مفير في سلوم السبولي = كل بدله يقتنع بالنهايات
ولاني مع العالم عديم الدلولي = اعرف سلوم الناس واهل الدعايات
ولاني بلباس الثياب الهمولي = ولاني على اهل الستر كشاف عورات
ولاني بسماع لدف الطبولي = ان دفها الواشي ولن راحت وجات
اخذت خيرات الرجال الكهولي = مجربين اللين والعسر بالذات
بصبر الجمال اللي تشيل الحمولي = اصبر ليا جتني من القوم ضدات
وكم واحد بين العرب ومعزولي = عنهم بعقل وفكر بعض المسافات
وكم واحد يسبق جويد الخيولي = سباق لاجاته كبار الملمات
وبيني وبينك مثل حلف الفضولي = عهد قديم مثل نقش القريات
واعرفك يابو ناصر تعرف قولي = بالمصلحه والنصح لاهل المروات
يشهد على هذا الشهود العدولي = ويوم القيامه فيه نار وجنات
يوم عظيم وفيه هول الذهولي = المرضعه تذهل عن الطفل ساعات

لو القصيد يفيد ويرد الارواح =رفيقي انظم به ميات القصايد
اللي يشاركني همومي والافراح = وعز الله اللي راح ماهو بعايد
الحزن وسط القلب والدمع سفاح = على فراقه واصبح الهم زايد
ولاني يابو ناصر بدنيياي مرتاح = بعدك ولاني وسط هالكون هايد
سهران اهوجس لين بلاج الاصباح = والصدر به ضيقه وفيه الوقايد
واحس في كبدي كما طعن الارماح = كني من الفرقا طريح الوسايد
رفيق عمري والخوي ياملا راح = يوم الثلوث الفجر يوم النكايد
جاني خبر هاتف كما بارق لاح = ماكنت اصدق يازمان الزهايد
فجر الثلوث اربع عشر صوت ونياح =لاطفاله الخمسه ولاهو بفايد
والموت صدق وحق ماعنه مجناح = الانبياء ماتوا وذا شرع سايد
والصبر زين وفيه تضميد الاجراح =ومصيرنا بين اللحد والسنايد