أعجبني الحادي بطرق الهلالي

أعجبني الحادي بطرق الهلالي=وهجرست توي بالهجيني أجاريه
ولياه في حاله وأنا أتعبت حالي=كلٍ على طرقه تحده معانيه
طرقه يهله من قراحٍ زلالي=وأنا شرابي عكَّر الوقت صافيه
من هم قلبٍ بين سالي وصالي=ومابين مليانه ومابين مافيه
مرَّة طعام المر يتلاه حالي=ومرَّة طعم حالي مراره في تاليه
وأنا بديت الحزن بأول هلالي=وهلال بأقفل به والأحزان تخفيه
والناس كلٍ للموالي يوالي=ماتعرف الوالي من اللي يواليه
عدٍ بلا دلوٍ عليه الحبالي=لا خير في دلوٍ تقطَّع عراويه
واحد تحسبه مثل صرف الريالي=وليا نصتك النايبة ما تلاقيه
وأحدٍ كما ثوبٍ من الشمس بالي=ماكل حملٍ لارتكى له يوقيه
وأحدٍ قمر مبداه وقت الزوال=مافاد نوره دام شمسه تغطيه
ولاذم من يكسر لغاليه غالي=لكن مرار الوقت ضيَّع حلاويه
العظم يجبر لانكسر بالعدالي=والخاطر المكسور منه يداويه
ولايشتكي عبدٍ من الهم خالي=لو كان مابه شيء بالحيل معضيه
لكن عسى رب الملا والجلالي=خالق جميع الكون مرسي رواسيه
يعين منه غرِّبته الليالي=وأمسى غريبٍ والبلاوي تحاديه
سبحانه اللي لابتلا بالبلاوي=كلٍ على قده ينزل بلاويه