ديوان الشاعر محسن بن حويان الغيداني

ياليت بيني والحبيـب جهـازي=واكلمه دون العـرب تستفـزا
هات القلم والبوك يالورع جازي=واكتب بيوتٍ كلها باحرف الـزا
نبي على حسن الكلام امتيازي=لعـل يدلـه خاطـرٍ مشمئـزا
عزالله اني لو تلزيـت جـازي=لو كان حالي في كرامه وعـزا
وانا عزيز بوسط ربعٍ عـزازي=بس المولع جـازيٍ لـو تلـزا
ياتـل قلبـي تلـةٍ بانهـزازي=على اللذي لاقصى المعاليق جزا
العنق عنق اللي يقود الجوازي=وان ذار من قفرٍ رعابه وفـزا
وعين اللذي مرباه قمة خزازي=حيث الحرار لكل عالـي تنـزا
تحب روس الشامخات النوازي=دايم بـراس النايفـه تبرهـزا
ياابو حمود اشكي لكم باعتزازي=وحنا اللذي في مثلكم نستعـزا
حيث انكم من لابةٍ ما تهـازي=مثل الجبال الراسيـه ماتهـزا