ديوان الشاعرعبدالرحمن بن عاتق البيضاني (راحل)

اعداد ما ينذكـر طيبـك=بين الملا والشهود شهود
سلام نبعـه مشاريبـك=يانبع نبعه عسل وشهود
اليوم وصلـت مكاتيبـك=يا مرحبا بالكرم والجود
نمشي على حسب ترتيبك=ابدع ولك مني المـردود
لاشك عندي في تهذيبك=وتأخيركم ماعليه نقود
لكن المعاليق تنخيبـك=متكوية من اسى ولهود
ما يردنا عن مواجيبـك=طول السفر والليال السود
عطني بدايـة مطاليبـك=وحبل الوصل بيننا ممدود
تخيل المـوج يغديبـك=في وسط لجه بدون زنود
حتى مجاديفـك تسيبـك=وتنكسر والسبب مفقـود
حيرتنـي كيـف اسويبـك=لكن معك نبـذل المجهـود
اللي في حالـك وتعذيبـك=أكيد يا صاحبـي محسـود
احذر من الشـك يسريبـك=ويرميك في بحر ما له حدود
غيّـر دروبـك واساليبـك=والجأ الى الخالق المعبـود