ديوان الشاعر محمد سعد اليوبي (لافي)

الزم مكانك فالتغرب مهانه=وقِيم حقْ الجار لو كان لك جار
وأحفظ لسانك فالدنيه مدانه=والعبد يبلى والزمن قيل دوَّار
وخذْ من راع الجزايل سمانه=ترى الهفية ماتسعر بمسعار
وإن صاح صايح يازبون الأمانة=حذراك من دون الملازيم تحتار
ولد الحمولة ما يعرف الخيانة=وإن جات من خاين شقاه على النار
الرجل قالوا .. مايخلي مكانه=مادام له حشمة ولزمة ومقدار
ألا ليا شاف الجفا من زمانه=واجب عليه يغير الدار بالدار
عزيز من سيفه بَرَى له سنانه= ولايجلس الا مع طويلين الاشبار
لاحتاجهم في حاجت(ن) زاد شانه= ولا يساومه نذل(ن)على راس مسمار
ومن غرته نفسه غرق في هوانه=ودارت به الدنيا على كبار وصغر
قامت تصافق به على كل خانه=وضاعت حياته بين خاين وغدار
وأمسى يردد صاحب الأسطوانة=( الله يعين اللي على الغبن صبار)

مني على منصايه أبن هديبان=أزكى تحية بادية بالسلامي
الحر الاشقر مقري الصقر شيهان=راع الثمينة من جزيل الكلامي
أعداد ما يهدل ويهدل بالافنان=طير الحمام وهل وبل الجهامي
الناصح اللي لابدا ميل الاغصان=جاب النصيحة وافية بالتمامي
ولا ساق قول المدح من دون برهان=وخلا البرية غارقة في الظلامي
يالربع ردوني ليا كنت غلطان=أنتم ذراية في الذرى ياحزامي
راع المثايل قال مافيه دخان=من دون نارمولعه في الحطامي

انفذي ياشهب ما بين السحاب= بالمسوَّم للمجاهر في فلاة
واستمدي لانعق رأس الغراب=النجوم اللي تقادح في سماه
ماضحكنا يوم يطرد في السراب=خوف ربي يبتلينا من ضماه
وإن سكتنا يوم ما دل الصواب=ولا سمعنا للمصيِّح في خلاه
خوف وقتٍ لاطوى طي الكتاب=المجازي بالخزى يلقى جزاه
الله أكبر يالرميتة من الطناب=يا معوِّد وش بلاه اللي بلاه
إن غزاه الشيب من بعد الشباب=ولا تفكر غايته .. ربه عصاه
ما يقدِّر لابتدأ وقت الحساب=وش يحصل في كتابه لا قراه
يا الله إني طالبك وقت الصعاب=قاصدينك يوم ما نعرف مداه
يوم تعلى الروس وتطيح الذناب=ومن تعلق في رميتة ما لقاه

لا ياعذا عرق(ن) سقى جمة البير=وأغنى مراويها وخضَّر شجرها
لاتسوق في ليل الهبوب المعاذير=ما كل ليلة يستوي لك قمرها
ولا تخيل لادكت خيارالمغاتير=برق السحابة اللي بعيد(ن)مطرها
يكفيك من لقمان حسن التدابير=ويسد من زرقاء اليمامة نظرها
دام الجزايل راجحات التعابير=تعطى لرجل(ن) مايِنيِّر ذمرها
عزيز من يربح نهار المخاسير=وعزاه من عنده ثمينة كسرها
الرجل لو حالت عليه المقادير=لاشاف كسرة من رفيقه جبرها
مايعيد لاطاح الجمـل للمناشير=ويقصر خطاه وعثرته ماسترها
وياهاجسي وأين البشر والتباشير=وأين العيون اللي تطاير شررها
أعيتني الدنيا بكثر التفاكير= والعين جافت نومها من سهرها
دارت عليَّه أطلالها بالتداوير=وأطرى عليه الدار واللي عمرها
راحوا عن الديرة وقفوا مسايير=وشدوا منازلهم وخلَّوا أثرها
يا الله ياحيٍّ لك الخير وتخير=تخير للي حاجته ما قدرها
من جور دنيا مقبله بالمناذير=ومن شرنفس(ن) غاوية في كدرها
من لا رفع نفسه بحشمه وتقدير=يتبع هواها لاهوت ماهجرها
لابد من وقت(ن) تجاب التقارير=ويذوق راع الحنظلة من ثمرها