ديوان الشاعر/بدر بن عواد الحويفي الحربي

هذه قصيدة للشاعر ابراهيم النجيدي مسندها على الشاعر بدر الحويفي ..

يقول النجيدي:

بديت بسم اللـي عبيـده خواشيـع=محيي العظام الباليه داخـل القـاع
لرضـاه هلـن العيـون المداميـع=وامسيت من خوفه جفولٍ ومرتـاع
ومن بعدها ياللي تحـط الطوابيـع=لتسع مية وعشرين بالـرس شيـاع
صنـدوق حـرٍ ماكـره بالمرافيـع=من يسمع اسمه بالعناوين ماضـاع
بـدر علومـه بالشكالـه ملاميـع=بدر الحويفي فج للطيـب مصـراع
من لابـةٍ لاذكارهـا بالوفـا ذيـع=حرب الحرايب مطوعة كل طمـاع
يابو سلمان الكـم بقلبـي مشاريـع=من ذكرك اللي كنه السيـف قطـاع
بالشعر خليـت القوافـي مطاويـع=وصقار دهلت الوحش صار مطواع
ودليل ربعك فـي فيـاضٍ مرابيـع=ليـا سمـر بكفوفهـم كـل طـلاع
ليـا درج خـربٍ وراه المتابـيـع=وراحن يخوضن لجة الجـو شـلاع
هديـت بحـريٍ كفوفـه قواطيـع=طلب اطيار وحوّل الجول في سـاع
نجمّ وجاك مـن النجـوم المرابيـع=من صايده خلى احمر الـدم نبـاع
وباقيـه لحقـوه النشامـى فوازيـع=في شوزنٍ ماضيعـت كـل فقـاع
وعقب العصير ليا تمشوا مع الريـع=وبعض النشامى للحطب صار جماع
وجو في براحٍ بين خضر المقاشيـع=بالديرة اللي لابرق الريش مرتـاع
وشبو وخلو نارهـم لـه شعاشيـع=تحت السماء ماغطوا الراس بشراع
وخذو من الهيـل المبهـر قراطيـع=وقرمٍ غدى لملبـد الريـش مـزاع
وحطو عشاهم من فعـول البواتيـع=الله ياقاهـن مـن ارداد واقــلاع
وعقب العشاء شالو طيور مفاريـع=ونسر الطيور مقظبٍ بين الاصبـاع
ودارت سواليفٍ تشـوق المساميـع=سوالفٍ يطـرب لهـا كـل سمـاع
احدٍ شراء للغـز واحـدٍ لـه يبيـع=واحدٍ يجيب ابيوت له ذوق وايقـاع
والصبح مع صوت الطيور السواجيع=ليا طر نور الصبح من قبل الاشعاع
عقب الصلاة وعقب هيـل وتقاديـع=لهم على تجديد الاخبـار مرجـاع
وطاحو على اللي بالطفل له مواقيع=في ديـرةٍ ماداجهـا كـل مريـاع
واخذ عن اللـي بالبراقـع مقانيـع=شقرٍ يـداون بالهـدد كـل ملتـاع
تل السبوق ولفّـع الخـرب تلفيـع=يشـدى لحيـدٍ حاذفينـه بمـقـلاع
هذا الذي قلبك لـه يـذوب ويميـع=وسجل لك التاريخ في حبـه ابـداع
ماهو بحـب مدندشـات المقاطيـع=اللـي هواهـن بالمعاليـق لسـاع
وانا هـواي بخايـعٍ لـه ذعاذيـع=ليا اطلع القرناس من بين الاشمـاع
وتمت بذكر مشفـع الخلـق تشفيـع=محمـد الهـادي علـى كـل نفـاع
من واحدٍ ماجمـع القـاف تجميـع=لعيون مـن ذكـره للأنـذال لقّـاع
من ضامري ماني براعـي تراقيـع=للي على كـل القوافـي لكـم بـاع
ولك التحيه فـي ختـام المواضيـع=ياشاعـرٍ ماهـاب غبـاة الاقـواع

ورد عليه الشاعر بدر الحويفي .. يقول الحويفي:

يوم النجيدي طـوّع القـاف تطويـع=وجاله على جزلات الامثال مرمـاع
فتـح لبيبـان القريحـه مصاريـع=من طيب فكره ماتـردد ولا ضـاع
يامرحبـا قـدر ومحبـه وتشجيـع=عداد من صلـى وسبّـح بالاصبـاع
يامرحبـا عـدّ النجـوم اللوامـيـع=وعداد ماتصغي للأصوات الاسمـاع
من شاعرٍ ودّع صدى الشعر توديـع=شايب وعن شعر النبط مقلع اقـلاع
من كثر ماعانى حصل لـه موانيـع=وصامت على مكنونها حدب الاضلاع
لكن مع الطّيب نبـي نطلـع الريـع=واجاوبه حسب اقتـداري بالابـداع
راع الصنيعه لـه علينـا مصانيـع=ماني بخيل بوصل الاصحاب قطـاع
يابـو محمـد يابعـيـد المنـاويـع=خذ ماتيسر وانـت مانتـه بطمـاع
انتـه قطفـت ازهـار وردٍ مهانيـع=خذ ماتيسر وانـت مانتـه بطمـاع
انتـه قطفـت ازهـار وردٍ مهانيـع=وانا اتلمس طايـح الـورد بالقـاع
سكـرت قدامـي جميـع المطاليـع=وامسيت اراود بين منهج ومرجـاع
الموجب لـو بغيـت انـوي البيـع=اخاف تقصر عملتي عن وفا الصاع
عسى علـى توسـع البـال توسيـع=ان كان مقدوري على الشعر ماطاع
حيث ان مالي في بحـوره دوافيـع=من عقب ماني نوخذة لنش واشـراع
العام اركز فـي بحـوره مشاريـع=واليوم اسدد عن جزيلـه بالاربـاع
ومن شان موضوعك طيور ومطاليع=ونقل الحرار اللي على الصيد بتـاع
هدفـك طيـب ياحفيـد المـداريـع=خلانـي افتـح للتماثيـل مصـراع
معنى بيوتـك زعزعنـي زعازيـع=ازعاج بالاعجـاب مانـي بمرتـاع
وزعتـهـن بــالاوراق تـوزيـع=مشكور ما جنـي بشاشـة ومذيـاع
ولعـت قلبـي يابراهـيـم تولـيـع=وذكرتني دوري مع الطيـر هـزاع
وحب الطيور هوايـةٍ مالهـا ريـع=الا الوناسه مـع طويليـن الابـواع
يوم الولـع ينعـش قلـوبٍ مواليـع=والصيـد مادونـه حوامـي ومنـاع
نلقى الجوازي بالصحاري مخاضيـع=والبر فيه اشكال مـن كـل الانـواع
واليوم ماحتـى نشـوف الجرابيـع=يم الديار اللي بهـا صيـد واسبـاع
صارت صقارتنـا حلـوم ونوازيـع=تقـل دراويـشٍ مـع البـر سيـاع
مقناص بس نضّيع الوقـت تضييـع=نقفي ونقبـل بيـن وديـان واتـلاع
وعلاجنا كشـف البـروق اللواميـع=وريح المطر لا حركه نـود ذعـذاع
مـع النشامـى طيبيـن المفـازيـع=شرواك وامثالك شريفيـن الاطبـاع
واسلم وسامح كان بالقـول ترجيـع=الله يجيرك من صواديـف الاوجـاع