ديوان الشاعر/بدر بن عواد الحويفي الحربي

وهذه قصيدة اخرى للشاعر الكبير جزا بن صالح مسندها على الشاعر الكبير بدر الحويفي ... يقول جزا:

يابدر يامشكاي هب الهـوا غـرب=وهبّت علينا مع غيـاب الغروبـي
هيفيـةٍ يامسنـدي تقلـع السـرب=صلفٍ هواها واستشـاط الهبوبـي
وتصفق عليّه يابدر ناعـم التـرب=وعلي تصفق من شمـال وجنوبـي
والمعجزات العشر ماعنّهن هـرب=ولام طريقٍ لـو بغيـت الهروبـي
ولو كان ليّه مع نسم عجهـن درب=لابد مامشي مع هواء النود دوبـي
هذا صحيح وكـل شـيٍ مجـرب=ولا من مفرٍ والبشر لـه اعيوبـي
وانا اتحملهن على العسر والكـرب=وراع الادب لازم صبورٍ وادوبـي
ومواقفـي يـوم المثايـل تعاقـب=كلٍ سمعني فـي طرايـف لعوبـي
لاكن يجينا هـرج نـاسٍ تهـرب=هـرجٍ هلـه ياسبقهـم للهروبـي
هرجٍ جديـد وبالضمايـر تشـرب=لين استشمت ضربةٍ فـي اجنوبـي
حكين وتفسيـره علينـا تضـارب=وموجهٍ يابـدر صوبـك وصوبـي
والهرج يوم انـه علينـا تسـرب=كـلٍ بعرفـه دون حقـه ينـوبـي
وانا عصايه راسها من عصا حرب=واعد نفسي من شبـاب الحروبـي
واللي علينـا يالحويفـي تعرقـب=لا يرمي الصيـده ولاسـد نوبـي
لاشك بعض العوج مالقي لها طـب=ولا تنحمل وانا الضمير امعطوبـي
ولا بد راس الحيف مايسطح الغرب=ليا تلته بارشـاه خطـو القصوبـي
غير السباع اللـي علينـا تقانـب=اللي تقانب في طـوال الهضوبـي
وانته وانا يابدر فـي راس مرقـب=وانا معك وانته صعيـب الدروبـي
وش راي راسك يالشجاع المجرب=في بعض هرج مثل وصف الذهوبي
انا افتـح الموضـوع والا اتجنـب=وش راي فكرك يا الأديب اللعوبـي
وكان انت تامرني نشب الخبر شب=وانا على بـدع المثايـل طروبـي
حنا نصب القاف من روسنا صـب=من شان راع الهرج عنـا يتوبـي
وانا بري وانـت للقـاف تطـرب=حيث انت تفهم في معاني اسلوبـي
والشك والتهمه على لاحس الـرب=وربه على روس الشوارب يذوبـي
وان كان بعض الناس قـام يتقلـب=يابدر عرفي فيك حـل الصعوبـي
وانته حكيم وراس شلفـاك تلهـب=وراع الطنا منك يشـق الجيوبـي
يالحر يالقطـاع يالذيـب الاشهـب=ياللي على خصمك تطق الكعوبـي
وكان المدارى يابدر فيـه مقضـب=القلب من كثـر المـدارى يهوبـي
واليوم كان انت تجنبـت الاجـرب=كثرت علينا الجرب من كل صوبي
وهذا وتسلم والسلامه مـن الـرب=وعسا تسلم مـن جميـع الذنوبـي

ورد الحويفي يقول:

حي الجواب اللـي لفانـي مرتـب=من شاعرٍ وجّـه معانيـه صوبـي
ابيات جتنـي مـن حكيـمٍ مهـذب=جبـار ماهـو مسنحاني نصـوبـي
يالماس يالفولاذ يالسيـف الأحـدب=لا قامت الحيـه تحـك الجنوبـي
يوم المحازم يابو صالـح تكـرب=لك ماقفٍ عند الرجـال محسوبـي
وانا على داعـي طلبـك اتوهـب=واللي سنحكم لامـسٍ كـم ثوبـي
ممنون يالسيف الصقيـل المجـرب=لانفخت عمـي الافـاع الذروبـي
لقامت اصوات الضواري تجـاوب=هذا يبـا الغـاره وهـذا يحوبـي
عندك قذايف من لمس صلوها شب=ومجهـزه لمدوريـن النشـوبـي
ورحاك يطحن حيدها شاتل الحـب=وسياتهـا لملقطـيـن الحبـوبـي
وجهاز فكـرك بالعدالـه مركـب=وخسران بعض الناس حق ووجوبي
وان كان دبـدوبٍ دبـا بيننـا دب=حشم جنابك عن دبيـب الدبوبـي
لو خيلهم مع كـل شـارع تهـاذب=اسلاحهم بـروق نبـات الدعوبـي
وطبوعنا مـن طبعهـم ماتناسـب=وتلقى عليهـم لـو تـدوّر نقوبـي
خشاش صيـفٍ للجحيـم يتجـاذب=جندٍ عن النطق الجميل محجوبـي
بكبودهم جمـره وبعيونهـم شـب=ويرّقعـون خلولـهـم بالكـذوبـي
جرب الحلوق اللي علينـا تعاقـب=امعلـقـه ومخـزمـه بالهلـوبـي
وان كان تنخاني على طلي الأجرب=الجرب تطلى لـو رغاهاطنوبـي
هذا ويكرم كـل شهـمٍ مشـورب=عيال الحمايـل طيبيـن النسوبـي
مانظلـم العالـم ولا نقبـل السـب=ولا نزرع الوسواس بين الشعوبـي
حنا انـا شيمـه وذمـه ومذهـب=وندرا الحظوظ ولا نغط الحسوبـي
وان كان نسناس الهوا يمنـا هـب=يدرا غضبنا كل وجـهٍ غضوبـي
من هازنا عنـد المطاليـع ينشـب=لاشـان نطـق ملغميـن القلوبـي
لو هو عطيب وبالشجاعه تصلـب=ان زلّت الشيمـه تـراه مهزوبـي
رمحي على راع النقيلي مصـوب=حربي وضد اللي يـذم الحروبـي
كان اجنبي والا ولد عـم واقـرب=ماني باحله لـو يضيـق الخنوبـي
لو كـان ودي بالسعـه واتجنـب=اهل النمايم لـو سكـت اشمتوبـي
ناسٍ تـذب انفوسهـا بالخطـا ذب=جسو جزاء صالح وانـا برقوبـي
لكن لهم عنـدي قذايـف تزهـب=يضرب هدفهن كل زول محصوبي
اخـص نـاسٍ للمشاكـل تواثـب=تجار هـرج مفرقيـن الحزوبـي
ناسٍ تبـي روس البدايـد تناشـب=وهذي طبايع كـل سبـوٍ سبوبـي
واللي يبي جـو الصداقـة يخـرب=ردي حظ وعـن نحـاه مغلوبـي
يفرح ليا شاف القنابـل تضـارب=وش مقصده راع الحصان الهذوبي
يركض مع الغفله ويجحر عن النب=وراسه على النطق الذميم معصوبي
متوهمٍ في مـخ راسـه ومعجـب=سمـاه غيـم والتـراب معروبـي
وجهتها للـي ليـا جـات رحـب=جزاء ولد صالح عزيـز النسوبـي
وبل سلامـي كـل شبـلٍ مـذرب=وانتـه وكيـل وبالنيابـه تنوبـي
اهد السـلام لكـل رجـلٍ مشبـب=اللي بركـن الباديـه واسمعوبـي
والمعذرة كـان ان بالقيـل منقـب=الكامـل اللـي مطلـع بالغيوبـي
حيث ان تـوي بالنشيـد اتـدرب=ان كان انا قصرت باللـي هقوبـي