،‘، درر قمر طيبة ،‘،

تذكرني ليالي البرد بأيام مضت لي
تذكرني بهذاك البرد و بأدفى سوالفنا
بمجلسنا و بالشايب اللي للحكايا
من شفاته طعم غير00
ترتسم مره أبتسامه في عيونه
ومره الدمعه تخونه
تلعب الذكرى بأحاسيسه 00تصور لي
أجمل تعابيره
قاسي يالزمان تجرح بليا شعور
عزيز أول تخونه عبرته هالحين
لامن طراك و لاحت بباله طيوف الصحاب00
و هزت أسماء الأماكن الأولى
حنايا خافقه 00
وماعاد يقوى على الذكرى00
الوفاء طبعه و فطره الله على الإيمان
عشق هاك الشمال وغرب وجهته هالوقت
صحيح من القهر نزع الجذور
ومفارق الأوطان00
ولكن للشمال يقول أبوي :
عشق خاص وطعم غير00
من يعيش أيام فيه صعب يسلاه أو يعافه00
يظل العمر كله ماله من أماني
غير أنه يرجع له يعيشه وقت ثاني 00
من يلومه ماعرف طعم الحياة إلا هناك00
*
*
يجدد هالشتاء داخله هاك الحنين
يسولف لي عن أول كيف كانت حرب
عن سلمهم 00عن حربهم
كيف جاعوا كيف غربهم ربيع الارض
وكيف 00وكيف 00وكيف
وأنا عيني على وجهه أحاول أحفظ
هالملامح اللي حيَل تعنيني
هالتجاعيد اللي ملت وجهه
والدموع اللي ماتفارق محجر عيونه لا حكى
والقوه المستضعفه الساكنه في تجاعيد الكفوف
تملاني فخر00
وينبهني بصوته معاي أنتِ وإلا مليتِ
سوالف شايب(ن) تعبان
أبتسم وكلي وله :
لا يابعدهم أملَ نفسي ولا أملَك00
لكن كنت أفكر وودي أسأل:
كيف كان البرد أول؟
يتبسم جعلني كلي فداه00