مرشد البذال والثاني سليمان الهويدي

06-08-06, 06:38 PM

الله اكبر كل ماخايلت براق السحايب= فيه لديت العيون وقلت ذا مهو بعيدي
أتحرا لي سنة وأبحث عن كبار السبايب=طالت الدعوى وانا وياك يا القاف العنيدي
انعسف لي بالرضا والطيب ولا بالغصايب= ما تعوّدنا نمد الناس بالمد الزهيدي
كل قولٍ غير قول الله به مخطي وصايب= الصواب بقول ربي والخطا بقول العبيدي
لي سنه لاجيت اقول القاف قلت القاف شايب=مْتحيربالمعاني وبطواريق القصيدي
لا يدنن الهجوس ولايهبن الهبايب=وصرت مثل مدور الرقروق من شان الزبيدي
عن طريق الشعر واهل الشعر ريحت الركايب=لين شوّقني لسوق القاف فوزان الرشيدي
شاعرٍ شعره يعدّي به على روس الجذايب=وكل عارف من كلام اهل المعرفة يستفيدي
اشهد انه شاعرٍ لا من نوى ماهو بهايب=يجمع الحكمة وفتل البيت والراي السديدي
شعره يذكرني اللى روسهم تحت النصايب=مرشد البذال والثاني سليمان الهويدي
وغيرهم ياكثر شعارٍ يسدّون النوايب=كل وقتٍ له رجال وكل ضدٍ له ضديدي
والمعرفة موهبة والشعر من ضمن الوهايب=شاعرٍ شوفه قريب وشاعرٍ شوفه بعيدي
يم راعي مرحبا ودي سلامي يانجايب=واحدٍ ماهوبراعي مرحبا ما هو مفيدي
يارشيدي ياسلايل من يضدون الحرايب=فعلهم ماهو جديد وطيبهم ماهو جديدي
يوم جهزنا المطية بالشداد و بالجنايب=ودّنا نسمع كلامٍ مايذوب مع الجليدي
ويش رايك في مريضٍ حي وضلوعه حطايب=والسبب ناس يخلطون الجديد مع الرديدي
واسلم وسلّم على ر بعٍ يحلّون النشا يب=والهدف من معرفة شرواك ابى ازوّد رصيدي