ديوان الشاعر علي عبيد الحصني

يا الي تقول اليوم ماشي على وين = بيني وبين البر باقي علاقه
علاقتاً ماهي جديده لها اسنين = معه العلاقه قبل اقص البطاقه
وللبر في قلبي محبه لاهل حين = والا القدم ما كل مرقاب واقه
والها عن المنهاج حروة اسبوعين = والبال ضاق من البلد وصتفاقه
لجه وصجه وازدحام ودخاخين = وتبلش لاوأنك ماهراً بسواقه
ياللي تقول السوق يجمع هل الزين = قلبي لشوف البر زاد اشتياقه
مرتاح لين احط شويه على يمين = واخذ مع الخط الطويل انطلاقه
وأن بان لي تلٍ مقابله تلين = أخذ يمين ومشيتي في رواقه
وأنزل على فياضاً سوات البساتين = ريح النفل فيهن تقل ريح باقه
ذيك الفياض اللي ذكرها ابن حثلين = بعد انتحا عنها لهل الشوق ساقه
وليا نزلت اجمع من الرمث كومين= والنار اولعها بعرف ولباقه
ومن وارد الرسلان حضرت ثنتين = وصلحت فنجالان لذيذن مذاقه
والهيل هو والبن كيف السلاطين =ماهو بكيف اهل الهروج الدقاقه
وقمت اتلافت وين راع البعارين = اللي يرحب بالضيوف ابشفاقه
ولاني من اهل البل ولا من هل الضين = لكن لي باهل المراجل رفاقه
البل تبي رجلاً رصيده ملا يين =وانا رصيدي ما يجيني بناقه
وتبالها وايت وصبيان حرصين = وقتن ماهو وقت العصا والعلاقه
علمي بها قدام خمسه وتسعين = يوم (ن) ابوي يودع اتلا نياقه
سني صغير ولا اعرف الشين والزين = عمري ثلاث وخمس ما له لحاقه
واليوم نفسي وين واللي تبي وين = مالي على اللي ترغب النفس طاقه
والا محبتها بوسط الشرايين =والقلب رايح من هواها احراقه