ديوان الشاعر// عبدالعزيز بن حمود ابالعون

من جارتي ما أملى مناظر عيوني=ولا ني وأنا أبو حمود قصَّاص جرَّة
ما أتابع الغـرات لـو اتهمونـي=ولا ني من اللـي يتّبعهـن بغـرّة
ولا ني من اللي يطردون البدونـي=ولا أحب هرج الناس كشفه وسرّه
وألزي ليا من الرجـال ظهدونـي=وأزيد عن ما بـيّ ثلاثيـن مـرّة
وآخذ حساب اللي تعرض لشونـي=واصد عن من صد عنـي بشـرّّه
ولا اخلي البسمة تعدى السنونـي=خوفٍ من اللي هرجته مـا تسـرّه
امراة في وجهي وموسٍ طعونـي=تصطي على عظم الفـؤاد وتقـرّه
واتبع هوى اخوياي كان اعسروني=واجبر خواطرهم لـو إنـي مكـرّه
لو أنهم شاخـوا علـي العفونـي=اللي كبارتهـم مـن العمـر مـرّة
يمكن خلال أسبوع لي يرجعونـي=واكسب صداقتهـم بليّـا مضـرّة
هذي وصوفي كان صحّت ظنونـي=والظن يـا نيـاّف سـوّ ومغـرّة
ولا هو بنافعني أليا ما امدحونـي=مدّاح نفسه ما فعـل مـا يضـرّه
يا منيف من قلبي عذابي وكونـي=قلب العنا اللي كل طـاري يجـرّه
نوبٍ يجرّه جر لأدنـى الغصونـي=ونوبٍ يلوفه لوف عشـب المكـره
كن الفراش مبعثـرٍ بـه فنونـي=وعيني بها من ملحـة الـزاد ذرّة
تشـدا هماليـلٍ تهـل الغشونـي=يسوقهـا خيـالٍ سريـعٍ بــدرة
وقلبي حنون ويستحـب الحنونـي=ا للي أليا شاف الصديـق يتشـرّه
انصاه ولا لي في خطات المجوني=اللي عن الماجوب فيـه اقصعـرّه
ما غير مثل الضب عند المكونـي=دايم مقابلهـا تقـل وجـه هـرّة
ماهوب مثل اللي يشيل الطنونـي=شيّال مـا شـال المعشـق بـزرّه
اللي يحطون الشحـم بالصحونـي=ذباحة اللي لـون كبـش المجـرّة
والله لآصلهـم وتاصـل ضعونـي=لو دونهم يا منيف عثعـث وحـرّة
هذاك عنـده يـا أهلـي دورونـي=تـراي فـي بيتـه بسـرّه وقـرّة
سامحتكم وانتم بعـد سامحونـي=والمعرفـة مـن بيننـا مستمـرّة