الارهاااااابيه بالارهاب

السلام عليكم
اخواني الاعزاء وتاج راسي في ملتقى قبيلتنا العظيمه اعترف اعترف بالتقصير الكبير مني تجاهكم وتجاه هذا الصرح الغالي علينا كباقي منتدياتنا الخاصه بالقبيله ولكن والله ان الظروف لا تسمح سواً ظروف عمل في منطقه نائيه وغيرها من ظروف الحياه التي لا تخفى عليكم فارجو منكم المعذره
ساكتب لكم هذا اليوم قصيده عمرها تقريبا ثلاث سنوات ولم يسبق ان نشرتها في النت ولكن تشرفت في القأها في احد ليالي حرب بتواجد شعراء كبار من القبيله وهم ( لافي حمود الغيداني - جوهر غالب العلوي- صالح بن غانم العوني -فواز بن ماجد الديري) وكان هناك من الشعراء الشباب دبيان العوفي و زبار الوهبي
بسم الله

راكب الي تو فكو فيه باب = توووه مجمرك ونزل من سفينه
دقو القيمه على خشمه ذياب = طلعو رقمه وحطو لوحتينه
جيب VXR ضد الإكتئاب= من شراه يموت ماحسب لدينه
صمموه بمصنعه شكل انسياب= ينعزل ضغط الهواء عن رفرفينه
لونه ابيض ما تقول الا سحاب= ماني موصف وغيري واصفينه
خط في جنبه مثل نقش الخضاب=ايه وكفوف الجميله جانبينه
لشتغل صوته يشابه نفخ داب= لولا مشيه ماتحسب به مكينه
يوم حول كن وجه ليث غاب= ويتنشد وينه اصعب درب وينه
نطب به شبل ٍ عزيز ولا يهاب= مرضين ربه ومرضي والدينه
زيه سعودي ولا يكشخ بكاب= طقها عصبه وشمر ساعدينه
مايبي في طرقته شيل وزهاب= همه البنزين عبا تانكيينه
قلت له وقف ثواني واستجاب= واستلم علمي عسى الله لا يهينه
قلت له قد الفيافي والهضاب=خل عداده يدنق لميتينه
ولا وصلت العاصمه قدم الغياب= انص من لزم الثقال بمنكبينه
راعي الطولات فكاك النشاب= سيدي نايف عسى تبطي سنينه
كلنا في دورنا شيب وشباب= بعد عين الله نمنا تحت عينه
منهي القالات مرفوع الجناب= حب لي متنه وقبلي جبينه
ثم تراجع خطوه وعطه الكتاب=خط باسم الشعب يمه مرسلينه
إيتضمن راينا ضد الارهاب= نردعه بالفعل ما يكفي ندينه
الارهاب 00 اصله تعدي وارتكاب= كل جرم بكل عدوان وضغينه
مايجيبه للجهاد اي انتساب= ولا يمثل غيرة الديّن لدينه
ديننا سامي تعاليم واداب= ديننا سمح وعقايدنا متينه
ولعبو في سمعته شله 0000= في فعول ٍ منتنه مدري مشينه
قتل مع تفجير تدمير وخراب= حتى في مكه وبحدود المدينه
مجرمين قلوبهم لون الغراب = كم صغير ٍ بالمهاد ميتمينه
وكم عجوز ٍ راسها من الوقت شاب= عندها واحد ورجواها سمينه
يوم ذاقت نفعه و ودا وجاب= شلة الارهاب لاهم قاتلينه
من هو المسؤل عن عمر العذاب= والدموع الي من الفرقا حزينه
ومن هو المسؤل عن مر الشراب = يجرعه محروم من يمنا عوينه
شايب ٍ مجروح من كبر المصاب= ماتداري عبرته راحة يمينه
وبالرياض بشهر رحمه واحتساب = والامام بمنبره رافع يدينه
يطلب الله بجزل لعبده ثواب =مسلم ٍ خاشع وخلفه مسلمينه
فجرو ماهمهم سوء العقاب= لجل اهداف ٍ لعينه ثم لعينه
نسيو افضال الوطن بالاغتراب =مرخصينه من جهلهم مرخصينه
مادرو من دونه نسوق الرقاب = من بغى فيه النزاعات لنهينه
مانساوم لو على ذرة تراب = للوطن معروف محنا لاحقينه
والله لنبترهم بروس الحراب = بتر ساق ٍ ملتهب بالغرغرينه

وسلامتكم
اسف على الاطاله

صح لسانك
كلماتك غايه في الروعه
أحييك على هذا البوح المتميز
دمت ودام شعرك وبوحك مبدعا

صح لسانك وعلا شانك

والله يعطيك العافيه على القصيده الجزله

بيض الله وجهك

تحياتي

صح لسانك ..

قصيده رائعه واحساس اروع ..

أسجل اعجابي

ويعطيك العافيه ..

الله يـعـطـيـك الـعـافيـــــــــــة على القصيده وصح لسانك مليون
بيض الله وجهك

الاخ الشاعر الكبير / مهدي الو هــــــــبي
صح لسانك و بيض الله وجهك
كفيت و وفيت يالغالي

صح السانك

وعساك على القوة ان شاء الله

بيض الله وجهك

صح لسانك وسلم بنانك

صح لسانـكـ وعـلا شانـكـ ...

حكمة وجزالة ..


صح لسانك